Nunka mi por a pensa ku tin muhé mièrdè manera esun aki!

Reading Time: 6 minutes

 Na momentu ku mi a skibi e buki ‘Awa, Habon ku Past’i Djente’ nunka mi por a pensa ku hende lo a les’é, anto bisa mi ku nan a hari te lora abou. E buki ta kontené  kosnan serio i tristu ku mi a pasa aden. Mi no por imagina mi hende ta hari tristesa di otro. Mi a disidí di hinka tur mi eksperenshanan den un buki, pa hende haña duele di mi i duna mi brasa di konsuelo. Nunka mi por a pensa ku un hende lo por ta kapas di kumpra mi buki, anto despues manda un mensahe asin’aki p’ami:

AHPD review

Awó abo lo ta puntra bo mes, ta kiko di mi bida mi a skibi den e buki anto? Bo ke mi duna bo un ehèmpel?  Bo ke mi mustra bo kon kruel hende por ta? Wak aki….

Algun tempu pasá mi a konosé un yùfrou masha dushi i bunita mes. E muhé aki tabata e muhé perfekto p’ami. E tabata  tin e haltura perfekto, un kurpa perfekto, anto ku e tetenan di mas perfekto ku m’a yegi mira. Su kara masha bunita mes. Aparte di tin un tremendo kurpa, e tabata sabí tambe. Ami kuné por a kombersá ora nan largu sin ku mi ta kansa òf kue fadá kuné. Nos tabata bai sinta masha dushi mes na pir riba laman for di 7or di anochi anto keda kombersá di diferente tema te 5or di mardugá.

Anto bo sa kiko mi gusta di dje? E ta kayente mané su so. Maske nos por a kòmbersá temanan interesante ku hopi profundidat, pa un  òf otro motibu, semper tur kos tabata bai kaba na sèks.

Nos por kuminsa papia di re-enkarnashon i e kos ta bai kaba na sèks. Nos por kuminsá papia di eutanasia, i e kos ta bai kaba na sèks. Anto mas ku klaro, kada bes ku e kombersashon bai kaba na sèks, nos ta sèks ku otro tambe. Tabata tin un kímika enorme i masha bunita den ami ku e dama aki. Mi a primintí mi mes di trat’é mas mihó posibel, pa e no bai laga mi nunka.

Anto bo sa kiko te kos di mas dushi? Nunka ami no tin ku pidi pa sèks. E muhé aki ta asina kayente ku a ni rosea e no ta ‘na mi chèns di hala. Manera nos kòmbersashonnan kuminsá bira kayente, e ta puntra mi “Bon, sla ta bai kai òf kiko?”

RihannaPero tabata tin un problema: e muhé aki tin tres yu. Anto el a bisa mi ku si mi ke drenta relashon kuné, mi mester ta kla pa bira tata di tur su tres yu nan. Normalmente lo mi a ninga, pero el a keda papia yen ko’i kayente den mi kabes, bisa mi kon muhá e ta bira pa hòmbernan ku gusta mucha, te ku mi a aseptá. Awèl….nunka bo no a yeg’i aseptá algu awe, anto despues ripará ku bo a tuma un hopi mal desishon?

Na momentu ku mi a konosé e yunan, tur koriente den mi kurpa a brua. E muchanan ta rékete fèrfelu. Nan ta papia pió ku lora. Aparte di esei, esun di mas grandi a raspa mi outo, esun di dos a dal mi winshil kibra ku bala di ‘baseball’ anto esun di mas chikí ta mané Einstein den kurpa di un beibi. Masha sabí mes. E ta bin ku kara lif riba mi, pidi mi brasa ku sunchi ku kos, despues a resultá ku el a spioná mi, wak e pin di mi telefòn p’e bai duna su mama.

Aparte di esei, un bia e yu chikí a zuai mi telefòn benta pafó di outo, miéntras nos tabata riba kaminda. Nunka e mama a ofresé pa kumpra un nobo pa mi. Kada bes ku e yunan hasi algu malu ku ta kosta mi sèn, e mama tabata hunga mi asina bon, pone mi lubidá, anto mi mes ta bai drecha mi kosnan òf kumpra nobo boka ketu. Mi tabata puntra mi mes kada bes ku si ta e muhé ta mièrdè òf ta ami ta pen-bieu.

Riba un dia mi tabata trankil na kas, mi ta risibí un ‘app’ di e muhé ta bisa mi ku e yu di mas chikí mester di pèmpers, pero e no tin sèn. El a pidi mi si mi por kumpra pèmpers p’e beibi.

Awó e kos ta, ku mi tambe ta bashí mané un krou. Na e momentu ei ta 10 heldu so mi tabata tin den mi pòtmòni ku mi tabata bai uza pa kumpra un kaha ‘cornflakes’ i un bleki lechi pa mi pasa luna kuné. Awó bo ta kere ku mi ta bai uza mi 10 heldu, keda ku hamber, pa un mucha ku mi no a traha, haña pèmpers bisti? Bo kabes no por ta bon!

Mi a ‘app’ e bèk bis’é ku ora e mester di algu, e tin ku ‘app’ tata di e yu promé. Si e no bin kla, e ‘app’ tur e èksnan ku e tabata tin promé. Anto si ainda e no bin kla, e ora ei e por ‘app’ mi pidi mi algu.  El a ‘app’ mi bèk i bisa mi “Ta bon dushi”.

Ta asina hende hòmber mester ta. Tipo di muhénan asina, bo mester stret nan mesora pone nan na nan lugá. No laga nan tuma hasi chocho!

Pero…..segun dianan ta bai m’a ripara ku e no ta pidi mi sèks mas. Mi di kasi sigur e muhé aki a rabia, anto manera tur otro muhé, nan ta uza sèks pa kastigá e hòmber. Pero ami no ta tuma e ko’i kèns ei. Mi a disidí bai serka dje pa mi stret e mesora den su kara den su ‘face’!

Mi a yega su dilanti para lomba règt, pusha pechu dilanti i ku bos firme mi a puntr’é: Bon dushi….ta kiko? Bo no ta pidi sla mas?

E di ku mi “Papi bo a bisa mi ku ora mi mester di algu, mi ‘app’ tur mi èksnan, anto si den kaso niun no por, e ora ei mi pidi abo tòg? Awèl ora mi tin mester di sla tambe, mi ta ‘app’ mi tur èksnan. Pa e motibu ei te ainda bo no a yega na bùrt ainda.”

Rihanna 2

Warda bo bùrt trankil papi!

Ora mi konta hende e kosnan aki, nan ta kuminsá hari mi den mi kara. Riba Facebook mi sa mira yen hende ta hari kosnan ku mi ta skibi. Anto tin di nan ta tribi bisa mi ku mi a drecha nan siman. Pero ta asina hende a bira awendia. Nan gusta hari tristesa di otro. P’esei mes mi a skibi e buki ‘Awa, Habon ku Past’i Djente’. Ya bo ta haña un show kompletu lesando tur mi desgrasianan i hari mi tristesa pa bo sinti bo felis!

Bo por haña e buki aki na Mensing’s Caminada òf personal serka mi! Si bo ta na Hulanda, Aruba òf Boneiru, bo por kumpra e vershon digital serka mi. Manda mi un e-mail na lionel_326@hotmail.com pa mas informashon!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.