Lo bo no ta kere, pero tur e 10 kosnan aki a pasa di bèrdat!

Reading Time: 9 minutes

 Tin algun kos ku ta pasa den bida ku ta simplemente muchu straño pa hende kere, pero pa prèt i ridíkulo ku nan ta zona, e historianan aki a pasa ègt di bèrdat. E historianan aki ta prueba ku  aparentemente tur kos ta posibel.

 1. Bo tin ku kasa ku mi kabritu

Imposibel 1Tin hòmber ku gusta sèks ku muhé, tin hòmber ku gusta sèks ku hòmber, i tin hòmber ku gusta sèks ku bestia tambe. Un hòmber sudanes a keda gará den oranan lat di mardugá ta sèks ku un kabritu. Doño di e kabritu a tende zonidonan straño pafó, i ora el a sali el a topa un hòmber, ku nan a yama “Mr. Tombe”, ta sèks ku su kabritu. Ora el a grita e hòmber, e hòmber a spanta i kai for di lomba di e kabritu. Akinan e doño di e kabritu a kaptur’é i ten’é mará te ora polis a yega. Aparentemente tin un kos ku yama konseho di ansiano na Sudan, i akinan e doño di e kabritu a eksigí Mr.Tombe pa pag’é 15000 Dinar Sudanes (50 dòler) i a obligá e hòmber pa kasa ku su kabritu. Mr.Tombe a kasa ku e kabritu kende a keda yama “Rose” i segun nan ta bisa, nan ta felismente kasá!

2.  Mi ta hiba mi mes korte
Na 2006 un hòmber di Kentucky, yamá Larry Rutman, a demanda su mes pa 300 mil dòler pa motibu ku el a lansa un búmeran i e búmeran a bin bèk i dal su mes den kabes. Segun Rutman, el a aktua ku negligensha i sin koutela kual ta loke a kousa e aksidente. Den korte wes a duna Rutman rason, pues el a gana e kaso i e tin ku paga su mes 300 mil doler.

Imposibel 2Lo bo pensa ta ki e hòmber idiot aki? E mes tin ku paga su mes? Pero loke bo no sa, ta ku su kompania di seguro mester a pag’é e montante di 300 mil dòler. Segun Rutman, pa hopi aña el a paga pa e seguro aki pa dado kaso algu asin’aki mester sosodé.

E aksidente segun Rutman a afektá su memoria i a hasié seksualmente opseshoná. Pa e motibu ei e kier a demanda e kompania ku a traha e búmeran tambe, pero su abogado a deskonseh’é esei.

(E historia aki parse di no ta bèrdat, pero fo’i aña 1996 e ta kore rònd riba Internèt, anto kasi sigur ta promé bia bo ta tende di dje.)

3. M’a kere bo di bo no ke bai fièrnu?
Semper m’a kere ku niun hende no ke bai fièrnu, pasó tur hende ta hasi manera ku nan ta mas santu ku papa di Roma, i ora hende hasi nan algu malu nan ta bisa e hende “Go to hell”

Imposibel 3Pero n’e mes momentu nan ta kumpra un serbes aleman ku yama ‘Fucking Hell’. E nòmber pa e serbes aki a keda rechasá na promé instante , pero esnan ku a krea e serbes na 2010, esta Stefan Fellenberg i Florian Krause, a splika ku e ‘Fucking’ ta referí na un pueblo di Oustria, i ‘Hell’ ta referí na serbes pálido. No tin nada malu ku esei. Awe e serbes aki ta keda bendí na Oropa, Asia i Oustralia.

Moral di e historia aki ta: hasi malu numa, ta bo splikashon mester ta bon!

4. Atrako? Uhm, bosnan por bin bèk aki ratu? Pasó aworakí mi ta hopi drùk!
Dos hòmber di Chicago a bai tira un atrako na un restorant ku pistol di awa ku nan a tene bou di nan T-shirt. E doño di e restorant a pidi nan enkaresidamente pa regresá despues di un ora pa motibu ku e ta hopi drùk. E atrakadónan a komplasé doño di e restorant. Nan a bai pa bin bèk mas lat, sinembargo ora nan a regresá polis tabata wardando riba nan.

Ounke e atrakadónan mester tuma poko lès riba e área aki, tòg mi ta haña doño di e restorant por a sikiera duna nan un tayó di kuminda, ya komo ku ta esei nan a eksigí den e atrako.

Imposibel 4

Mario Garcia i Domingo Garcia-Hernandez

5. Ta kuantu ora bosnan ta traha anto?
Den un restorant na China, hendenan tabata mira un pareha traha for di 6or di mainta te 3or di mardugá sin stòp. Nan a yama e pareha aki “Duo Robòt” pasó nan a kere ku e hendenan aki no ta hende. Despues e hendenan a realisá ku no ta un pareha sino dos pareha diferente. Ta trata aki di dos pareha ku ta konsistí di dos ruman hòmber ohochi idéntiko ku a kasa ku dos ruman muhé ohochi idéntiko. Pa kolmo un di e parehanan a haña yunan ohochi idéntiko tambe.

Imposibel 9

6. Mi nòmber di bèrdat ta ‘Phuc Dat Bich’!
Un hòmber vietnames-oustraliano di 23 aña di edat ku yama Phuc Dat Bich, a risibí tremendo atenshon den media despues ku su ‘post’ a bira viral. El a publiká su pasport riba Facebook pa motibu ku kada bes Facebook tabata sera su kuenta dor di su nòmber ku ta zona similar na “Fuck that Bitch”.

Imposibel 6Bou di e foto el a skibi un mensahe na Facebook pa bisa nan ku di bèrdat su nòmber ta Phuc Dat Bich i e pasport ta e prueba.

Despues e hòmber a duna di konosé ku henter e kos ta un farse. Su intenshon tabata pa prueba kon e kanalnan di media di mas grandi ta kue un historia sin konfirmá si ta algu di ta bèrdat i hasié un notisia grandi.

Niun hende no por a prueba ku si di bèrdat e hòmber su nòmber no ta Phuc Dat Bich. Tin sospecho ku su nòmber real ta Tin Le!

 7. E mihó dil na mundu!
Un abogado franses yamá Andre-Francois Raffray, ku 47 aña di edat a sera un dil ku un dama Jeanne Calment di 90 aña di edat. E dil ta bisa ku e abogado lo a paga e dama un montante di 500 dòler tur luna te dia e dama fayesé, pa asina pasa e apartamentu di e dama over na e abogado. Esaki riba su mes ta zona un bon dil, pasó mi ke men, ta kuantu aña mas un muhé di 90 aña lo por biba?

Wèl, e abogado a muri ku 77 aña di edat, lagando e dama na bida. Pa 30 aña largu e abogado a keda paga pa un apartamentu ku nunka el a haña chèns di biba aden, pagando un total di 180 mil dòler, kual ta dos bia mas tantu ku balor di e apartamentu.

Pa kolmo, e dil tabata bisa ku dado kaso e abogado muri i e dama keda na bida, e kasá di e abogado lo mester sigui paga e 500 dòler pa luna, i dado kaso e kasa tambe fayesé, e yunan lo tin ku sigui pasa.

Pa mala suerte di e abogado, Jeanne Calment a resultá di ta e muhé ku a bai den ‘Guiness Book of Records’ pa a biba 122 aña. Ken por a pensa?

Imposibel 8

Jeanne Calment

8. Ang kemen buki bashí tambe ta bende anto?
Tin un buki ku yama “Everything men know about women” i ta konsistí di 100 página kompletamente blanku (bashí). Anto loke ta mas prèt ainda, e buki a bende mas ku un mion kopia.

Riba e kaft di e buki bo ta mira ku e outor ta un sikólogo yamá Dr. Alan Francis, pero en realidat esun ku a krea e buki ta Cindy Cashman, kende ta un outor i empresario. E úniko kos ku Cindy kier a bisa ku e buki aki, ta ku hende hòmber no sa nada di hende muhé.

Imposibel 10Mi a subi Amazon wak si bèrdat e buki aki ta eksistí, i bèrdat e ta eksistí i nan ta bende na rason 6 dòler.

E kos di mas prèt ta ku e tin hopi bon reakshon. E hendenan a bisa ku e buki ta masha prèt mes. i ku e buki ta bisa nada mas ku e bèrdat. Den e buki tin djis un página ku ta bisa ku e buki ta intenshonalmente bashí. Un muhé a asta bisa ku el a kumpra 12 di e bukinan pa regalá su amiganan.

Anto ami ta sinta lesa yen buki, hasi yen investigashon, studia diferente materia pa mi por skibi un buki, kaminda fásilmente mi por saka un buki bashí i bende. Ta djis e kaft mester ta bon.

Niun hende no por a bisa mi?

9. Sin ñapa mi no ta kumpra nada!
Siguiendo riba e tema di buki, mi ta un hende ku lo no lesa niun buki a ménos ku e buki ta hopi bon. Pero kon mi por sa ku un buki ta hopi bon? Simpel, mi mester haña un ñapa di e buki pa mi mira ta kiko mi ta bai invertí mi sèn den dje. Si mi subi kualke ‘website’ i mi mira un buki na benta pero no tin un ñapa pa mi mira si e buki ta interesante òf nò, mi no ta kumpra niun buki. Asina simpel e kos ta.

Sinembargo mi mes ta pretendé ku bo tin ku bai buska mi bukinan  kaminda mi no tin un ñapa pa bo mira kiko tin den e buki. Esaki ta algu insólito di mi parti. Wèl, mi ta pidi masha diskulpa pa esei. Awor si mi a traha un ñapa di e bukinan pa bosnan, i pa mas fásil, aparte di pone nan riba e página di ‘Kibra Hacha’ i ‘Awa, Habon ku Past’i djente’, mi ta pone nan aki bou tambe:
Kibra Hacha preview pdf (Aktualmente ta digital so bo por kumpra e buki aki.)
Awa, Habon ku Past’i Djente preview pdf

Anto pa esnan ku ta wardando ‘Niun Pátaka’, ata djis un ñapa chikí pa bosnan:
Niun Pataka preview pdf

Un bia mas, mi diskulpa

10. Esaki te historia ku a gana

Imposibel 12E historia di mas prèt i inkreibel ta esun aki. E historia aki meresé un puesto den ‘hall of fame’. E historia aki meresé un ‘grammy award’. Esaki te historia ku lo kaba di pone kai for di bo stul. Esaki te historia ku ora bo les’é, bo ta puntra bo mes dikon hende ta asina? Dikon hende tin ku hasi e tipo di kosnan aki. Kon por ta posibel ku riba e mundu aki tin hende ku nunka no ta satisfecho ku nada? Kon por ta posibel ku riba e mundu aki tin hende asina kurioso? M’a duna bo nuebe historia interesante pa bo lesa, i ainda bo ke un mas? Mi no tin mas, ta nuebe so mi tabata tin. Pa kiko bo ta sigui lesa? Ta kla. E artíkulo a kaba aki.

Ass FI

Por sierto, e potrèt aki a keda uzá djis pa hala bo atenshon pa bo lesa mi artíkulo. Nada mas!

Fuente: Unbelievable Facts

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.