Kon bin ‘zwijgrecht’ por yuda Gerrit Schotte den korte, pero ami nò?

Reading Time: 4 minutes

Dia 11 di mart próksimo nos lo tende veredikto di wes riba e kaso di Gerrit Schotte. Durante tratamentu di e kaso nos tur por a mira kon tantu Gerrit komo su pareha Cicely a hasi uzo di nan derechi di keda ketu. Hopi hende a keda diskutí ku si esaki lo yuda nan si òf nò.

Ami en todo kaso ta kere ku ta konseho di nan abogado nan a sigui, i mi no ta kere ku e abogadonan lo a hasi esaki sabiendo ku e por perhudiká nan.

E último kaso grandi ku nos a konosé kaminda e defensor a hasi uzo di su derechi di keda ketu tabata Elvis Kuwas mihó konosí Mònster. Hopi hende ta kere ku el a sali di malu, pero de fakto el a haña un bon estadia pa bida largu, elektrisidat i awa pòrnada, kuminda pòrnada, e por biaha ‘businessclass’ ku protekshon di ‘bodyguard’, i e ta risibí eiskrim marka Häagen-Dasz na bordo di avion.

Pero pa mi por a haña un opinion mas al kaso riba e asuntu di derechi di keda ketu, mi a aserka mi propio abogado i puntr’é ku si e famoso ‘zwijgrecht’ ta yuda pa ku bo kaso den korte. E abogado aki a splika mi ku derechi di keda ketu semper ta yuda, pasó loke hustisia ni wes no ta pordoná ta si bo gaña. Si bo gaña, i nan prueba ku loke bo a bisa no ta basá riba bèrdat, esaki por ta desastroso pa bo. Pa e motibu ei, prinsipalmente si bo sa ku bo a hecha baina, ta kumbiní bo hasi uzo di bo derechi di keda ketu. Asin’aki bo no ta pompa bo mes, i si bin kastigu mes, e lo por ta mas leve.

Zwijgrecht FI

Pues mi a tuma e konseho di mi abogado hopi na serio i mi a bisa mi mes ku dado kaso mi haña mi den kualke problema pa kualke baina ku mi a hecha, lo mi hasi uzo di mi derechi di keda ketu.

Grandi tabata mi sorpresa ku e derechi di keda ketu aki no a yuda mi ku nèt nèt nada.

Pasó despues ku mi a kaba di hecha una baina chikitu i ku mi a wòrdu interogá, ami a keda para riba mi derechi di keda ketu, kual a kousa ku un vruminga a para bira hinter un olefante.

Skucha e siguiente oudio pa bo sa di kiko mi ta papia:

Pero asta riba e pregunta aki, mi a keda para fuerte, i mi a bolbe kontesta ku mi ta hasi uzo di mi derechi di keda ketu.

Wèl, awe mi tin ku bisa bosnan ku nan a saka mi fo’i kas i ku aworakí m’a haña mi ta bai biba bèk serka mi mama. Mi ta den proseso di divorsio, i mi ta lantando un kaso kontra di mi abogado pa motibu ku el a duna mi e pió konseho ku m’a yeg’i haña den mi bida!

Awor abo tende mi un kos aki:
Djasabra awor 27 di febrüari, lo bai tin un dia speshal na Biblioteka Nashonal di Kòrsou kaminda e outornan lokal di Kòrsou lo bai tei, anto mi tambe lo tei den nan! Akinan bo por hasi uzo di e oportunidat pa konosé bo outor(nan) preferí, hasi nan pregunta, saka potrèt, i mas ku klaro kumpra nan bukinan. Serka mi lo bo por haña ‘Awa, Habon ku Past’i Djente‘ i ‘Kibra Hacha‘ (‘Kibra Hacha’ su kantidat ta hopi limitá!)

P’esnan ku ta wardando ‘Niun Pátaka‘ si bo pasa, lo bo por haña un ñapa chikí, pa bo sa kon fèrfelu e kos tei bira!

E orario lo ta di 10:00  pa 13:00!

Abo lo bai tei, òf bo lo hasi uzo di bo derechi di buska un èsküs pa bo keda hasi floho na kas?

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.