Mi relato di aña nobo…..unu hopi tristu!

Reading Time: 3 minutes

Manera semper tur aña mi ta selebrá aña nobo na kas ku mi famianan tirando klapchi. E aña aki lo mester a bai meskos. Pero kosnan no a bai manera m’a spera…..

Faltando algu mas ku 30 minüt pa 12or bati, m’a bai kue mi sèrbètè pa mi baña pa kita sushi i mal airu di 2014, i bisti mi paña nobo ku m’a kumpra speshal pa drenta 2015 den dje. Nèt e momentu ei koriente a bai.

Mi a bai sinta den balkon warda, paso mi di ku imposibel Aqualectra ta bai laga mi drenta 2015 den sukú. Grandi tabata mi sorpresa ku 12or a bati, sin ku koriente a bin bèk.

Manera ta tradishon, nos den famia ta brasa otro i deseá otro bon aña. Pero esaki tabata masha difísil paso ni mira nos no ta mira otro, te pa brasa otro. Ata nos awó ta hunga “Marco Polo” den kas pa por duna otro bon aña.

E parti ku a lastimá mi sintimentunan profundamente tabata ku na lugá di nan bisa mi “Bon aña”, nan a bisa mi “Bo n’ baña”.

Awó mas ku klaro, nos tin ku tira e klapchinan. Ami semper ta uza plagatox pa sende e klapchinan. Mi no tin lusafè ni sigaria i tampoko laiter. Pa kolmo ta stof di koriente mi tin, pues di ningun manera mi no por a haña kandela pa sende mi klapchinan.

Ata mi awó ku flèshlait ta kana den kura pa buska dos pieda di kandela. A dura mi 1 ora pa mi por a haña dos pieda. Ata mi awó ku flèshlait ta purba sende klapchi dor di bati 2 pieda den otro. M’a sinti mi den tempu di “cavemen”. A dura mi 30 minüt pa mi por a sende un dònderbos. Pues mi a tuma 2 ora pa mi por a tira un pak’i dònderbos. Na e momentu ei m’a kue fadá tambe bai sinta den balkon sinta warda koriente bin.

Ora finalmente koriente a bin bèk, m’a bai baña. Ta tradishon ku ami ku mi kasá despues di tiru ta tira un otr’un tiru promé ku nos drumi. Pero el a bisa mi ku Aqualectra a kita tur su smak. Mi ta komprondé…..ta promé bia ku nos a drenta aña nobo den suku. Pues nos a bai drumi numa.

Ami, sumamente mal kontentu, no por a pega soño mesora. M’a keda bira bira riba kama pa por lo ménos 2 ora. Ora ku finalmente mi por a logra pega soño, ata mi kasá ta lanta mi pa bisa mi ku koriente a bolbe bai. Pa ki dònder e muhé ta lanta mi pa bisa mi e ko’i, mi no sa. Pues lógikamente m’a mand’é un grandi, anto el a rabia, saka mi pafó.

Pues mi a drumi sin koriente, anto pafó. Danki Dios mi tin un kachó ku por a hasi mi kompaño. Un aña nobo ku a habri mi hopi tristu. Mi ta spera esaki no ta nifiká nada pa 2015 si.

E relato aki a keda skibi dia 1 di yanüari 2015 pa mas o ménos 2or di mèrdia, pero miéntras mi tabata skibiend’é, koriente a bolbe bai, pone mi pèrdè tur kos. Awe dia 2, mi a disidí bolbe kuminsá skibi. Pero mi ta bai keda te aki si, paso si koriente bai atrobe……….

sleeping with dog

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.