Kuantu tempu bo tin ku warda promé ku bo kasa ku e persona ku bo ‘stima’?

Reading Time: 6 minutes

Komo penúltimo post pa aña 2015, mi ta bai trata e tema di kasamentu. Pasku ta yegando anto tin hende gusta uza lunanan ‘romántiko’ manera desèmber pa drenta e boto matrimonial, sin pensa ku si di bèrdat nan ta kla pa kasa òf nò. 

getting married2Hopi bia tur kos ta kuminsá ‘como pintar azucar color de rosa.’ Bo ta konosé un persona magnífiko, bo ta sinti un atrakshon òf sintimentu ku nunka di bo bida bo no a yeg’i sinti pa otro hende, bo ta sinti ku bo konosé e persona aki di mil aña kaba, bo ta asta pensa ku kisas den un bida anterior, bosnan lo mester tabata pareha òf ‘soulmate’ di otro, i yen otro ko’i loko mas ku ta brua tur bo chip.

Tur e kosnan aki ta kosnan masha komun ku hende ta pasa aden ora nan a konosé un persona ku den prinsipio ta krea un atrakshon grandi serka nos. E ‘vlindertjes’ nan ta kuminsá bula den barika, bo no por stòp di pensa riba e persona. Te asta ora bo ta den baño sintá riba pòchi, bo ta pensa riba e persona i sinti emoshonnan magnífiko ku ta stroba bo di saka e kosnan ku bo tin ku saka afó pa limpia bo paden. Despues di un par di dia òf luna, bo ta drenta un relashon ku e persona i bo ta sinti ku bosnan a uni ku otro pa eternidat, pues e siguiente stap kual ta matrimonio lo ta lógiko òf no?

Wèl, pèrmití mi trese bo bèk riba mundu un ratu. Pèrmití mi baha bo for di riba e nubianan ku bo ta ei. Pa di promé, ta masha normal ku den prinsipio di un relashon, bo ta mira un persona komo e pareha perfekto. Esei ta pasó bo mente ta ignorá tur loke ta imperfekto den e persona. Esaki usualmente ta sosodé den e loke nan ta yama ‘Honeymoon stage’. Tur loke bo ta nota aki nan ta loke bosnan tin en komun, òf tur e kosnan di e persona ku bo ta haña ta komplementá bo. Despues di e ‘Honeymoon Stage’ aki e kos ta bai sinta mes. Den mi buki ‘Kibra Hacha’ mi a splika ku tur relashon tin ku sali di un fase pa un otro fase, kaminda bo tin ku baha fo’i nubia i kuminsá biba riba tera. Keda pendiente pa e siguiente buki ‘Niun Pátaka’ kaminda ku mi ta bai kumpli ku loke mi a primintí fo’i dia mi a skibi ‘Kibra Hacha’!

Pero awor probablemente bo tin gana di kasa ku e persona ku bo ta kompletamente enamorá di dje. Kuantu tempu bo tin ku warda promé ku bo kasa?

Getting married3

Den tur relashon tin algun kos ku tin ku pasa, anto ta tuma tempu pa e kos ei pasa. Ta p’esei mi no ta kere den apstenshon di sèks manera algun religion ta praktiká, pasó pa motibu di speshi (deseo seksual pa esnan un tiki mas fini), hendenan ta kasa mas lihé, pa asina nan por sasia nan set seksual. Kualke hende ku konosé un persona i kasa den ménos ku un aña ta riba e mal ruta kaba. Dos aña mes ta poko riskante ainda. Tres aña ta ideal basta bosnan a konosé otro di bèrdat. Den mi proksimo buki ‘Niun Pátaka’ lo mi bai splika e parti kaminda lo bo bai ripara kambio den komportashon di hende, ku si bo no ta na altura òf konsiente ku nan lo sosodé, bo relashon lo bai direktamente den su ‘moer’. Pa aworakí mi ta splika kiko te kosnan ku abo tin ku realisá promé ku bo disidí na kasa:

1. Bo mester ta sigur ku bo ta kasa pasó bo ke, i no pa nesesidat òf preshon.
Ku nesesidat mi kiermen nesesidat di tur kos. Nesesidat di tin un pareha, nesesidat òf preshon sosial, nesesidat òf preshon familiar, nesesidat finansiero, nesesidat seksual, nesesidat pa traha yu, nesesidat (òf preshon) religioso etc. Fo’i ora bo ta den un relashon pa nesesidat, bo ta riba e mal kaminda kaba.

2. Bo a tuma bo tempu pa konosé e persona.
Hopi hende no sa kiko i kon nan ta konosé un persona. Tur loke nan ta hasi ta sali huntu, bai Movies, kome popcorn sera konosí ku e famia i pa nan esei ta tur kos. Sera konosí ku un persona ta algu hopi mas profundo. Bo mester sa kiko ta boso similaridat i atrakshonnan opuesto. Bo mester sa kiko t’e persona su soñonan, su metanan, su personalidat ku e no ta mustra niun hende. Kiko ta pone hari, kiko ta pone yora, kiko ta su pashon, kiko ta kibra su kurason etc.  Si bo no sa nada di e persona ku no ta inkluí abo den dje, bo no konosé e persona! Bo mester konosé tambe bosnan nivel di komunikashon i abilidat pa resolvé konflikto. E kosnan aki no ta sosodé den 1,2,3!

Si bo ta pensa ku tur loke Dios uni, ta Dios so por kibra, ta bon pa bo puntra Dios ta unda el a skonde bo seleber! Sali for di e mundu di fantasia ei.

3. Bo no ta konfundí
Hopi bia e hòmbernan ta hasi e propuesta di matrimonio, hasi algu grandi i genial, pone ku e muhé ta pèrdè strea di nort, i despues no tin kurashi pa ninga i bisa e hòmber “NO”. Ata nan awó yen di duda i tur konfundí. Si bo tin kualke konfushon òf duda, para e kos! Es mas, mas grandi i drùk e propuesta ta (loke e muhénan ta haña masha great), mas kos di skonde e hòmber tin.

4. Bo a skohe e persona aki pasó t’e ta disponibel
Tin hende ta kasa ku un persona pasó ta e persona ei t’esun ku tin disponibel. Nan no por a haña niun hende mas, pues nan ta dal bai ku loke tin. Wèl, bo por hasié, pero bo mester ta konsiente ku bo bida lo por bira bastante mizerabel. Si bo tin kualke otro hende ta pensa ratu ratu riba dje tambe, no ta masha bon idea pa bo kasa!

Tur esakinan ta djis konseho pa si bo ke p’abo matrimonio dura. Kisas bo no ta wòri si bo mester kasa i djis despues divorsiá atrobe. Si bo tin e pensamentu ei, dal bai. Pero si bo ta hende serio ku ta buskando algu serio, ta mihó bo primi brek i reflehá riba lokualnan ku mi a bisa bo.

Mi mes ta bai kasa dia 25 di desèmber aki ku Halle Berry, pasó Halle Berry ta parse mi un hende ku ta dispuesto na kasa ku e promé idiot ku pasa su dilanti, anto ami tin ku habri aña 2016 komo hòmber kasá pa mi impreshoná un par di hende.

Getting married1

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook

Leave a Reply

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.