Urgente: ta buska hendenan ku ke gana plaka kèsh ku polítika!

Reading Time: 9 minutes

 Dia 30 di sèptèmber próksimo lo bai tin elekshon parlamentario atrobe, kaminda 120.657 hende lo tin derechi di vota riba un di e 20 partidonan polítiko ku lo bai purba nan suerte pa drenta gobièrnu i hasi loke semper nos a hasi den polítika: tuma hende hasi!

Djaluna awor, esta mañan mainta for di 9:00 am, partidonan ku ke partisipá na elekshon benidero mester presentá nan lista i esnan ku no tin asiento aktualmente mester presentá komprobante di pago  di dos mil florin pa por partisipá na elekshon. Mi tambe ke bai partisipá na elekshon i un djis aki lo mi splika bo dikon. For di djamars último mester a mèldu pa por haña orario pa presentá lista djaluna, pero ami ta bai ‘bypass’ tur e rekesitonan ei ku djis un yamada telefóniko. Lo mi mester traha un lista polítiko ‘awe awe’ si, pa nos por bai entregá lista mañan ku ‘brassband’, show di motosaikel, desfile ku ‘cheerleaders’ i hinter un show di sirko.

Dikon mi ke bai elekshon?
Kòrsou aktualmente ta den un fase kaminda mayoria di e pueblo no ta kere den polítika mas. Mayoria hende no sa mas pa ken nan mester vota. Yen hende nèkdó tin den polítika. Nan ta retirá, bin bèk, bai kria yuana, bin bèk, retirá atrobe, bira minister, despues subi lista pa salba partido, retirá atrobe, bira direktor di kompania te ora nan pèrdè trabou, bin bèk, retirá fo’i polítika atrobe, despues lanta partido nobo ku ‘billboard’ ku kos den ménos ku un siman
bin buska mas manera pa pompa pueblo, anto pa straño ku parse, hende ta vota pa nan. Pa e motibu ei p’e próksimo elekshon den 2016 lo bai tin vários partido ku lo bai lanta manera ‘paddestoel’ pasó ainda tin mansa pa saka pastechi!

Aki bo por mira un lista kreá pa Sr. Ovilio ‘Liio’ Capriles, ku un kantidat total di 19 partido polítiko ku kier bai elekshon. Tin un partido mas ku no ta riba e lista akibou ku yama Movement R-16. (E nòmber ta zona mas manera motor di outo i no un partido polítiko.) No ta tur lo logra risibí e kantidat di 870 voto/firma di sosten, pero n’e kantidat so bo por mira ku sea nos ta mal dividí, òf Kòrsou tin hopi pastechi pa parti.

Partidonan politiko

Ta bon konosí pa nos tur ku polítika despues di iglesia, ta un tremendo manera pa bo traha plaka, saka diferente benefisio, sera un bon penshun, anto bira popular tambe (aunke kisas ku mal nòmber, pero ta ken ta preokupá ku esei awendia? Prinsipalmente pasó e pueblo votadó, no ta altura di nada ku ta pasa den su pais. Pues fásilmente un polítiko por para bo tras, hinka pal’i basora largu den bo atras sin hunta niun tiki vaselin, despues pasa bo dilanti, smail papia bunita ku bo, i bo ta bolbe vota p’e! Pues e kos ta keda manera kos ku bo gusta pa hende pusha kos seku seku den bo burak’i atras!)

Despues di a skibi i publiká e bukinan ‘Kibra Hacha’, ‘Awa, Habon ku Past’i Djente’ i ‘ Niun Pátaka’, ku a yuda  enrikesé bosnan ku un eksperensianan plasentero, lesando kosnan íntimo di mi bida, siñando bosnan yen kos nobo, inklusokomportashon di hende ku a ni sikólogonan no sa di dje,  mi ta kere awor a yega tempu pa porfin mi enrikesé mi mes. P’esei mi ta bai lanta un partido polítiko nobo, i mi ta bai tin mester di bo yudansa kual lo krea oportunidat pa bo tambe enrikesé bo mes! E partido ku mi ta bai lanta lo bai karga e nomber “Faboritismo Organisá Korsou Konstipá” (abreviá FOKK), anto nos lo skohe e bunita koló pretu kual tur hende ta koré p’e! Pa mi por hasi mi meta realidat, mi lo bai tin mester di lo siguiente:

Spònser:
Tarea di spònsernan ta pa duna nos plaka pa konvensé e pueblo pakiko nan tin ku vota pa mi partido. Esaki lo bai ta via dòrnamentu di Kòrsou tur na bandera, partiment’i flanèl ku pèchi, pone eventonan p’e hóbennan ku fásilmente nos por kumpra i manipulá ku bandanan popular, bibida di alkohòl, mucha muhénan sèksi ta kana den shòrt chikí i pèrtá, organisá kompetensha pa asina por parti diferente premio èts.

Ademas di esei nos lo mester pone diferente rifa pa e hendenan por gana kos. E pueblo di Kòrsou gusta ‘gamble’, pues nos lo pone rifanan pa gana outo, biahenan eksótiko i diferente otro premionan. (Boso no preokupá. E rifa ta djis pa popularidat, ‘fundraising’ i tuma hende hasi, pues nos lo hasi nos bèst pa tur premio keda aden pa asina nos por bolbe rifa e mesun kos atrobe.)

Tambe nos mester pasa diferente spòt na radio i televishon ku den prinsipio e hendenan lo haña nan masha idiot i despues nan lo bira iritante, pero tòg inkonsientemente lo drenta den nan supkonsiensia i pone nan kere ku nos lo ta e partido vensedó, i asina nan lo vota pa nos tòg!

Tijdstip politieke Partijen 2Miembronan di Parlamento
Akinan nos ta bai tin mester 21 persona ku lo bai bira miembro di parlamento. Tarea di miembronan di parlamento ta pa sigui liña di partido. Diskutí fuertemente riba moshonnan ku nos lo pasa pa kita mas plaka for di e pober. Den parlamento kada miembro mester hasi komo si fuera ku nan kurason ta pa e pueblo, pero defakto nos tur sa ku nos no tin kunes.

Promé ku bira miembro di parlamentu, lo bo fungi komo polítiko. Pues bo tarea ta pa kana bario i kumpra voto di hende. Tene na kuenta ku ya kaba e hendenan sa ku ta den temporada di elekshon so polítikonan ta kana bario pa bario, pues lo bo tin ku hasi algu diferente. Por ehèmpel bai hunga futbòl k’e muchanan riba vèlt, bai kas di e penshonado, hunga dominó i kòmbersá kuné, mustr’é ku awor si kambio ta bai bin. (Kòrda kana ku bo fotógrafo personal pa saka potrèt di tur esakinan pa publiká, sino ta mesun leu nos ta keda.)

E polítikonan mester bai debatenan na radio i televishon tambe. Bo mester tuma parti pa e pober, pasó ta nan t’e mayoria den e pueblo aki. Pues laga nan mira ku abo si ta bin p’e kambio real. Kaminda por, parti algun artíkulo di nesesidat aki aya. Por ehèmpel pida pan ku keshi, spèki, blek’i bonchi èts. Lo ta ideal si bo por bai na e skolnan tambe i hasi algu ‘leuk’ ku e muchanan. Kòrda bai ku bo fotógrafo pa saka potrèt i publiká esakinan. Asin’aki hende lo kai den bo trampa sigur i kere ku di bèrdat bo tin nan na pechu.

Tuma bon nota: den mi partido no tin kuent’i hòrta asiento bai kuné. E úniko asiento ku bo por bai kuné t’esun ku bo a bin kuné fo’i kas di bo mama!

Partido Politiko nobo 1Ministernan
Niun polítiko ku ta riba lista lo no por bira Minister. Esaki ta mi desishon. Nos ministernan mester ta hendenan studiá, manera dòkter, abogado, hendenan ku konosementu finansiero èts., pasó tin un gran kantidat di hende ta kere ku ora bo ta studiá ta kana pariba p’abou den kòl ku dashi, t’e ora ei bo ta sabí, i aparentemente nan lo laga bo hasi i deshasí manera bo haña ta bon. Ta ora bo no ta studiá nan ke bin subi bo lomba!

Tarea di ministernan ta simplemente kana h*de, saka potrèt aki aya, biaha, hasi dushi, basilá! Lo bo tin ku bai diferente ‘talk show’ i splika ki plan bo tin komo minister, djis pa tuma hende hasi. Lo ta bon si den sierto okashon bo por ‘pone òrdu’ kaminda tin hopi desòrdu. Pueblo lo bati man p’abo mas fásil asina, maske tras di kortina bo ta hòrta miónes di plaka i regla pastechi pa abo, bo kasá i hinter bo famia! Tur djaweps lo tin konferensha di prensa kaminda bo ta simplemente kome buskuchi i bebe kòfi den un ambiente ameno ku miembronan di prensa. Partido mes lo sòru kumpra medionan di prensa, lokutor i analistanan di e medionan di komunikashon pa asina yuda tapa bainanan ku bo hecha!

Den sierto okashon lo bo tin ku presentá den parlamento pa kontestá algun pregunta, i de bes en kuando lo bo tin ku hasi akto di presensia na eventonan kultural manera dia di bandera, dia di Rei, dia di Kòrsou, weganan di Reino konferenshanan ku Hulanda èts.

Partido Politiko nobo 3

Personanan ku abilidatnan spesial
Riba lista nos ta bai tin mester di personanan ku tin sierto abilidat òf talentonan spesial. Por ehèmpel nos ta bai tin mester di hendenan ku por gaña hopi, hendenan ku por traha video, saka potrèt, skibi i konta chiste. Tambe nos mester di hendenan di banda abou, hendenan ku ta militá den bandanan popular, bailarin, lokutor di radio, i tambe hendenan di misa.

Polítika ta un wega di gañamentu i kontament’i chiste, pues pa duna entrevista bo mester por gaña masha bon mes i simplemente tuma hende hasi. Nos mester keda presente riba medionan sosial, pues nos mester di hendenan pa krea ‘website’ i kontentido pa nos medionan sosial manera Facebook, Twitter èts., i tambe publiká diferente video i potrèt riba Instagram. Tambe nos mester di hendenan ku por keda den kontakto ku nos pueblo riba tur e plataformanan na nos disposishon.

Tambe nos mester di hendenan pa trèk voto di e diferente gruponan na Kòrsou. Banda Abou sigur ta un grandi i vulnerabel pa motibu ku no tin un dònder na Banda Abou, pues mester di un hende pa representá e área aki i primintí e hendenan e mesun kosnan di semper. Tambe tin hendenan ku ta vota riba hendenan ku nan konosé, anto si bo tin bon tipo i bo ta miembro di un banda popular, lo ta perfekto. Lo bo por kore kampaña primintiendo mas fiesta, bebementu, ‘jump up’, ‘jump in’, tokament’i tambú mei mei di aña, karnaval hinter aña èts. Kòrda ku e pueblo aki gusta fiesta i ta manera nan ta bisa na Hulandes “Dansend gaan we ten onder”. Finalmente nos mester di hendenan di misa tambe, pa por trèk e fiel kreyentenan. Pasó klaro, pa risibí bendishon di Dios, bo tin ku vota pa partido FOKK!

E trabou ta relativamente fásil i kada parlamentario i minister lo kobra riba 10 mil florin mensualmente. Si bo sinta kuater aña, lo bo tin un penshun bon reglá! Si bo ke ta spònser, lo bo kobra den forma di fabor, por ehèmpel, pida tereno, pèrmit pa negoshinan ilegal èts.

Pa apliká, por fabor manda nos bo karta di solisitut huntu ku bo CV awe mes, indikando kua puesto bo ke apliká p’e. Spònsernan por kuminsá na trese plaka pa nos mesora!

Ora hende puntra bo pa ken bo ta vota, kontestá uzando lema di nos partido: Ami ta FOKK tur dia, i abo?

FOKK sign 2

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook

Leave a Reply

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.