Seis tep pa yuda bo disipliná bo yu!

“Edukashon ta kuminsá na kas”

Kriansa i edukashon di un mucha no ta nada fásil, anto tiki ta keda hasí pa mustra hende e mihó maneranan pa atendé ku un mucha, di forma ku e por bira un adulto ku ta funshoná di forma sivilisá i responsabel den komunidat.

(Mi ta spera e artíkulo aki wòrdu lesá i kompartí meskos ku artíkulonan seksual ku tur hende ta sinti speshi riba nan i e kuentanan fiktisio ku ta pone bo hari riba algu ku no ta realidat! Esaki si ta realidat)

Mayoria di nos ta apliká e mesun kriansa i edukashon ku nos a risibí di nos mayornan, sea ku esei tabata bon òf malu. Algun mayor ta haña yu(nan) ku orea un tiki mas duru kompará ku otro mucha i tin problema pa logra haña e mucha sigui regla. E seis tepnan di disiplina aki lo por yuda bo pa ku edukashon di bo yu:

1. Premia bon komportashon
E mesun táktika ku nan ta uza pa train animal, bo mester apliká den edukashon di bo yu. Premia komportashonnan ku bo ta aprobá òf ke stimulá. Esaki no ta nifiká ku kada bes ku bo yu hasi algu bon, bo tin ku kumpra un kaha di chukulati p’e. Defakto, evitá di duna bo yu produktonan ku ta kontené suku. Tin mayor ta duna mucha suku (energia) anto despues ke pa e mucha sinta ketu. Ta meskos ku mi duna bo gas NOS (laughing gas), anto bisa bo no hari!

Pero e por ta un simpel palabra di elogio, por ehèmpel “Hopi bon Gedion”, òf dun’é “Hi 5”, un brasa òf pasa man na su kabes i bis’é ku loke el a hasi ta algu hopi bon.

Na momentu ku e hasi kosnan mas grandi ku ta di elogiá por ehèmpel un bon rapòrt, e ora ei bo por uza premionan mas grandi manera kumpra un ko’i hunga p’e òf algu asina.

Discipline a child 62. Pone regla nan kla ku e mucha ta komprondé!
Ta imposibel ku un mucha no ta kibra regla. Bo mes komo hende grandi sa probechá pasa den lus kòrá tin ora. Mucha tambe lo kibra ku regla tin bia. Pero bo reglanan mester ta kla i komprendibel. Si bo kastigá e mucha pa algu ku nunka bo no a bis’é di dje, e mucha no ta komprondé kiko bo ta bezig kuné. Tene kuenta ku si bo prohibí mucha na hasi yen kos, te ku e ta yega na un punto ku e no sa kiko p’e hasi e lo bai buska otro kos di hasi ku e no sa si e ta malu òf bon.

Por ehèmpel bo ta bisa un mucha ku e no mag wak televishon. Pues bo a bis’é kiko e no mag di hasi. E pregunta ta awó, kiko si e mag di hasi? Abo tin ku bisa e mucha esei bon kla i no laga p’e mucha mes bai skohe. Kòrda ku ta mucha e ta, no hende grandi.

3. Neutralisá argumentunan
Tin mucha gusta protestá i pusta boka. Komo mayor nos kier sa ku e mucha tin ku sigui nos regla i keda ketu. E mucha ta siñando kon pa ekspresá su mes, i na momentu ku bo a prohibié di algu, e lo ke ekspresá su mes. E lo bisa bo por ehèmpel “Si, pero no ta eerlijk.” E mucha ta ekspresando su mal kontentu. Evitá di basha salu riba su herida, i bisa algu manera “Drechi p’abo”. E kos ei ta meskos ku ora bo pèrdè trabou, anto un hende bisa bo “Drechi p’abo”. Lo bo no gusta tòg? Wèl, e mucha tampoko. Si e bisa bo “No ta eerlijk” bis’é algu manera: “Mi ta komprondé esei, pero ta asina e kos ta si!”

Si e mucha ta yora pa algu ku bo no a permitié òf algu ku bo a kita for di dje, lag’é yora. E tin ku ekspresá su mes. Pensamentunan manera “mucha hòmber no sa yora” Ta ridikules. Hòmber grandi mes ta yora ora ku nan muhé bai laga nan. Kon bo ke p’e mucha no yora?

Tin mucha ta yora pa malu, i tin ora bo ta mira esei. Bo por poné sinta pafó por ehèmpel te ora e kaba di yora, òf bo por imponé un kastigu pa kada minüt ku e ta yora awanan di kokodrilo. Por ehèmpel mand’é bai hasi algu ku e gusta hasi komo kastigu. Nèt e ora ei, e lo no tin gana di hasié. Mand’é bai skòp bala òf kore baiskel òf peña su pòpchinan te ora e stòp di yora. Ora e kaba di yora bo ta kaba di atendé kuné i splik’é un ke otro.

Kòrda ku mucha ta buska atenshon diferente manera, pues kisas ta bo atenshon e ta buska asina tambe. Bo tin ku dediká tempu, hopi tempu na bo yu. Fo’i ora bo a skohe pa bira mayor, bo mester por sa ku ta trabou duru tin. Tin mucha ta eksigí mas atenshon ku e otro. Tin mucha no por ta nan so niun ratu so. Tur ora bo mester ta bezig ku nan!

Pa muchanan hopi mala mucha òf hopi aktivo, manda nan hasi kos ku ta pone nan kima energia. Por ehèmpel dal dos rònchi rònt di kas i pone nan ripití un frase por ehèmpel: “Mi no tin mag di tira piedra den kurá di shon Chichi.”

Kòrda bon, no abuzá. Un mucha hopi aktivo por kore tres, kuater rònchi trankil. Binti rònchi ta di mas. E mucha ta kansa. NO ABUZA!

Discipline child 54. Trankilisá bo mes promé ku bo atendé ku bo yu
Mucha tin ora ta hasi kosnan ku ta pone bo rabia. Aunke nan ta bisa ku ta bon pa bo disipliná e mucha mesora, esaki no ta tur bia e mihó kos pa hasi, speshalmente si bo tin emoshonnan di rabia den bo. Tuma tempu pa bo trankilisá bo mes. Bisa e mucha ku el a hasi algu robes òf el a kibra ku un regla, i e mester risibí kastigu. Bis’é ku bo ta bai pensa kua disiplina ta e ta bai risibí pa su mal komportashon. Warda t’e ora bo kalma i despues atendé ku e mucha. Splik’é presis kiko el a hasi malu i dun’é su kastigu. Kòrda hasi loke bo a bisa, i no kambia idea despues. Bo mester ta konsistente!

Awendia tin hopi mucha ku nan atenshon ta kita un bes. Ora bo ta papia ku bo yu, sòru pa su atenshon ta na abo. Pero si bo ke bo yu skuchabo bo no mester grita. Abo lo no gusta un hende grita bo, pues niun mucha no gusta pa hende grita nan. Apliká un tono paternal (tono fuerte) pero no grita. Evitá di zundra komo si fuera ku bo tin tehi di e mucha. Kòrda ku mucha ta kulpa nan mes di tur kos, i nan lo bai pensa ku tin algu robes ku nan. Mas e mucha kulpa su mes, mas disfunshonal e ta bira.

5. Ser konsistente
Ta masha difísil pa un mucha mantené su mes na regla si bo no ta konsistente ku nan. Por ehèmpel bo no por ta premia sierto komportashon na kas, pero kastigá e mesun komportashon dilanti hende. Bo no por ta hari pasa prèt ora e mucha hasi algu, anto otro dia bo ta zundr’é i kastig’é pe mesun komportashon. Bo ta brua e mucha su chip i e ta bai bira difísil p’e kumpli ku bo reglanan.

6. Ser un modelo
Mucha no ta hasi loke bo bisa nan, mucha ta hasi loke ABO ta hasi. Bo por pone kuantu regla ku bo ke, dun’é kuantu splikashon ku bo ke, pero bo no por spera ku e mucha ta komportá su mes otro for di loke abo ta hasi. Kòrda ku pa e mucha ta abo ta su Dios. E mucha ta hasi loke abo ta hasi. Meskos ku bo tambe inkonsientemente ta imitá i kopia otro hende, mucha ta hasi meskos.

Father to Son CommunicationPráktika honestidat i atmití tambe ora abo ta robes pa e mucha sa ki ora bo komportashon tambe tabata robes.

Tene kuenta ku bo no ta bezig ta eduká un kòmpiuter ku bo ta djis programa. Ku kòmpiuternan mes tin ora sa flep. Mucha lo kibra regla òf protesta ora nan no ta haña ku nan ta risibí trato hustu, òf nan lo kibra regla djis pa e eksitashon di e kos. Bo tambe ta hasié, pues no hasi manera ku abo tin mag, pero e mucha nò. Splika e mucha ku tur komportashon robes ta bin ku su kastigu i ta esei ta loke ta importante pa e siña.

Kriansa i edukashon di mucha ta eksigí hopi tempu i pasenshi. Anto hopi mayor ta skohe pa e solushon di mas fásil, esta ‘dump’ e mucha na kualke ‘opvang’ òf lugá ku por atendé ku e yu òf kamindanan p’e por kore hunga ku otro mucha, ya asina nan liberá di e mucha pa e mayor por dediká tempu na su mes. Tur kaminda ku e mucha pasa, e ta piki kosnan di otro hendenan ku tin rondó di dje. Sòru pa bo pasa sufisiente tempu ku bo yu pa kita bek e lokualnan bo no ke pa e tin.

Muchanan ku ta hopi difísil pa atendé kuné òf ku no ta tende ètòl, buska yudansa profeshonal pa yuda bo ku nan. Kòrda ku mucha ta parti di un kadena familiar. Pues ta hinter e kadena familiar mester ta envolví den e tratamentu di e mucha. Sino, e lo no funshoná. Sa tin kasonan ku ta hinter e famia mester di yudansa, i no e mucha (so). Tin kasonan, defakto hopi kaso ku e mucha mes ta bon bon, te mayornan (famia) ta disfunshonal!

 

Discipline child 3No ta tur hende a nase pa ta mayor, pero si bo a disidí konsientemente na bira mama òf tata, bo tin ku tuma e trabou duru ku ta bin huntu kuné tambe.

Mi ta skibi tur esakinan ta pa hende stòp di dal, grita i kue fadá ku mucha of ‘dump’ nan na kualke kaminda pa por libra di nan. Abo no gusta pa hende dal bo, pues bo no tin ku dal niun mucha tampoko. Lesa e artíkulo “Stòp di dal mucha: Dalmentu di mucha ta prueba di bo inkapasidat komo mayor” pa bo sa dikon!

Si bo no tin yu ainda, preferibel keda sin yu, pasó seriamente tin muchu hende riba mundu. Pero si ègt bo ke tin bo famia, pensa bo bon, wak si di bèrdat bo ta kla p’e. No bai tras di preshon di hende òf loke nan ta bisa ku tur hende mester tin yu, pasó nan niun lo no bin yuda bo kria bo yu, òf ‘babysit’ pòrnada p’abo!

Konsiderá tur e métodonan ku tin pa evitá konsepshon. Tin hende ta kontra di aborto, ami nò. Asumiendo ku bo no ta kana sèks pa loko sin protekshon i hasi kos deskabeyá, konsiderá e diferente métodonan di aborto den kaso ku algu a bai “robes” si bo no ke òf ta kla pa tin yu. Pasó unabes e mucha ei nase, ta trabou ‘fulltime’ sin fakansi lo bo tin!

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.