Stòp di dal mucha: dalmentu di mucha ta mustra bo inkapasidat komo mayor!

Kon bo ta sinti bo si un hòmber kurpa grandi i brasa fuerte hisa man dal bo un wanta pasó bo a hasi algu ku e no gusta òf ku el a taha bo di dje? Bo ta haña e kos ei leuk? Bo ta kere bo ta komportá bo mes di tal forma djis pa e persona dal òf bati bo? Si bo no ta gusta, kon bo ta kere un mucha ta sintié ora bo dal e? Bo ta kere ta gusta e gusta sla ku e ta keda ripití e mesun komportashon djis pa bo dal e òf batié?

(Mi ta spera e artíkulo aki wòrdu lesá i kompartí meskos ku artíkulonan seksual ku tur hende ta sinti speshi riba nan i e kuentanan fiktisio ku ta pone bo hari riba algu ku no ta realidat! Esaki si ta realidat!)

Mi ta mira hopi hende ta rabia ku komportashon di mucha, i sin pensa dos bia ta hisa man i dal e mucha. Fo’i ora e mucha mira e mama òf tata ta bin, ya kaba el a sinti miedu den su kurpa pasó e sa kaba kiko ta bin. E mayor ta dal e mucha tòg, pasó el a hasi algu ku e mayor no gusta òf a bisa e mucha pa no hasi. Pero niun hende no ta para ketu i puntra nan mes dikon e mucha ta komportá su mes di tal forma?

Mi ta haña masha lamentabel ku ta pèrmití hende traha i eduká yu, sin eduká nan mes riba edukashon, komportashon i sintimentu di un mucha. Anto awó ku nos tin un komunidat ku yen problema siko-soshal ku nos no tin idea kon pa solushoná.

Stop hitting kids 1Pa di promé, segun hende ta krese, nan ta bin desaroyá nan mente konsiente kual ta responsabel pa lógika, rasonamentu, tomo di desishon, sano huisio, i forsa di boluntat. Hende grandi tin e mente kritiko pa e por filtra loke ta bon òf malu.

Mucha no tin un mente konsiente kompletamente desaroyá, i te ku nan 12 pa 14 aña nan mente kritiko ta suak. Ta p’esei ta fásil pa bo gaña un mucha, impreshoná nan ku kualke ko’i kèns, i ta p’esei tambe ta difísil pa nan huzga bon for di malu spesialmente di e tin mayornan inkonsistente. Pa e motibu ei nan ta bisa mucha ta inosente. A ni bestia no ta dal nan yu. Pero nos komo hende si!

Bo mester por eduká un mucha uzando ehèmpel, entonashon di bos (sin mester grita) i segun e mucha ta krese bo ta uza mas komunikashon verbal i no-verbal.

Pa di dos, un mucha semper ta pone su mayornan riba un pedestal. Pa e mucha, abo komo su mayor ta su Dios. E mucha ta preferá pensa ku tin algu robes kuné, enbes di pensa ku tin algu malu ku bo. Si bo ta zundra, grita, reklamá i kada bes dal e mucha, e ta bin krese pensando ku tin algu robes kuné. P’esei muchanan ta kulpa nan mes ku nan mayornan ta pleita òf divorsiá.

Stop hitting kids 4Kompronde e mucha!
Un mucha semper ke tene su famia uní. Si tin pleitamentu, diskushon etc den kas, e mucha ta preferá hasi algu malu pa dediká atenshon na dje i asina kita e atenshon for di e pleitamentu òf zundramentu. Maske e sa ku e ta bai haña kastigu òf sla.

Te asta hende grandi ku no ta pone atenshon na nan kurpa, por haña dolónan króniko i malesanan ku niun dòkter no por splika. Esei ta bo mente inkonsiente ku ta forsa bo mes na tuma un pousa, un deskanso i dediká tempu na bo mes. Un mucha por hasi meskos. E ta bira malu, pa protesta algu.

Mucha ta kurioso, mucha ke mishi ku tur kos, mucha ke purba tur kos. Ta nan manera di siña, i prosesá tur loke nan ta topa den e mundu aki. Mucha ta tribi na hasi diferente kos, pero nos komo hende grandi ta kastigá nan ora nan siña. Anto ora nos bira grandi nos ta ‘wonder’ dikon nos tin miedu di ekspresá, miedu di purba, miedu di frakasá etc.

Tin hende ta bati òf kastigá mucha si e pishi kama. Tin hende ta laga mucha pasa den bèrgwensa si e ta chupa dede. Niun di e kosnan ei no ta bin pòrnada. Ku hende grandi mes por pishi i te asta kaka nan paña ora nan spanta. Kon bo ke pa e mucha si kontrolá su mes?

Pa di promé, tur mucha ta pishi i lo keda pishi kama/paña te dia nan mente desaroyá kompletamente. Pa di dos, komportashonnan asina, por nifiká protesta ku e mucha tin, pa kualke kos ku ta hasi nan doló. Pero hende ta preferá hiba e mucha sikólogo i terapista, anto nan mes ta keda leu, ku nan murayanan di defensa haltu den laira.

Tin mayor ta zundra i dal mucha, pasó e mucha ta yora pòrnada. M’a ta kon bo ke p’e mucha ekspresá su mes? Kada bes ku bo zundra òf dal e mucha p’e no yora, tur loke e ta hasi ta kulpa su mes ku e ta ekspresá su mes na un manera ku su Dios no ke. E ta keda buska manera pa suprimí su emoshonnan. Emoshonnan ku nos suprimí no ta bai niun kaminda. E úniko kos ku ta pasa ta ku bo mente inkonsiente ta buska otro manera pa saka nan. Esei ta pone ku muchanan ta krea abitonan ku abo komo mayor no ta komprondé, òf komportashonnan igual, manera tentamentu òf dal/bringa ku otro mucha.

Stop hitting kids 2Ta inkreibel kon un mayor ku ta dal mucha, ta zundra e mucha pasó e ta dal otro mucha ta skol. No ta abo a siñ’é esei? Anto awor nos ta haña straño dikon tin tantu hòmber i muhé ta bati nan kasá òf pareha na kas?

Mi ta bolbe ripití:
Mucha ta hasi loke abo ta hasi. E mucha ta wak riba bo, pasó ta abo ta su Dios i e lo kulpa su mes pa tur kos ku bai robes den e famia. Bo mester por eduká un mucha uzando ehèmpel, entonashon di bos (maternal/paternal, sin mester grita) i segun e mucha ta krese bo ta uza mas komunikashon.

Mucha chikí te ku un òf dos aña bo por pasa nan un klap riba nan man ora nan ta mishi ku algu ku por forma peliger pa nan mes. Pero bo no por stòp nan di mishi. Ta nan manera di sera konosí ku e mundu ku nan ta biba den dje. Bo por uza kastigu nan físiko komo último método, pero meskos ku tur otro straf, si bo ta mira ku e no ta trese kambio den e komportashon, ta indikashon ku e método di disiplina ei no tin efekto. No tin sentido keda apliká algu ku NO ta funshonando tòg?

Pero nos komo hende gusta hasi e mesun kosnan un bia tras di otro, sperando resultadonan diferente. Anto miéntras tantu e mucha ta kulpa su mes di nos inkapasidat.

Apliká diferente kastigu/disiplina, wak kua ta yuda. Kòrda ku mucha ta buska atenshon diferente forma. (Lesa e artikulo ‘Seis tep pa yuda bo disipliná bo yu pa sa mas di kon disipliná un mucha.)

E kuent’i ‘Don’t spare the rod and spoil the child’ ta ridikules grandi. E kos ei a sali for di hendenan ku no tabata sa kon mente di un mucha ta funshoná, pues nan úniko manera di mustra disiplina ta dor di bati mucha.

Hendenan ku ta bisa ku nan a haña hopi sla na chikí, pesei nan a sali bon bon, tambe ta papia ridikules. Djis baha bo murayanan di defensa i bo ta mira kuantu emoshon bo a suprimí ku awe bo ta saka nan di un otro forma ku kisas bo mes no ta konsiente di dje!

Fo’i ora bo tin ku dal, esei ta mustra bo inkapasidat komo hende i mayor. Dalmentu/batimentu di mucha por ta indikashon ku bo ta sakando bo rabia i frustrashon riba e mucha tambe! Fo’i ora b’a disidí na haña yu bo mester por sa ku no ta trabou fásil tin.

Stop hitting kids 3Bo no por kastigá bo yu, pasó e ta eksigí mas atenshon, kompará ku yu di bo amigu/a ku si ta sinta ketu sin pidi niun hende atenshon. Kada hende ta diferente i kada mucha ta diferente. Ta imposibel ku bo ta trata un mucha manera ta ku hende grandi bo ta atendé kuné.

Por último, bo no por bebe alkohòl anto spera ku bo no ta bira fuma. Meskos ku bo no por duna e mucha un kantidat di suku i mal nutrishon, anto spera ku e ta sinta ketu i siña bon na skol!

Stòp di dal mucha!

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.