Muhé loko a her’i mata mi den Subway!

Reading Time: 5 minutes

Hende muhé awendia a bira un kos ku bo tin ku tene kuenta kuné. Mi tin un “amiga” ta sali kuné, pero su bida ta hopi drùk. Hinter dia e ta drùk ku trabou, e tin ku studia, e tin yen yu pa kria, enfin, nunka e no tin tempu pa mi. Anto ami ta hòmber ku gusta atenshon. Si bo no ta duna mi atenshon mané mi ke, mi ta reklamá te ora bo kabes eksplotá. Aparte di esei, mi gusta kome tambe, anto Subway sigur ta un di mi faboritonan.

Date at Subway 3Esei tabata motibu ku ayera, ya ku Subway tabata tin oferta di kumpra un bai ku dos, e amiga aki a yama mi ku stèm masha lif i eksitá, pa invitámi bai kome na Subway kuné. Ami mas ku klaro no sa ninga Subway, pues m’a bai

Nos a yega, kumpra un pan, haña dos, i el a kumpra dos kuki p’ami tambe. Nos a bai sinta kome masha ‘gezellig’ mes. Despues mi amiga a puntra mi si mi ke un mas. Mi a habri dos wowo asina hanchu i mas ku klaro mi a aseptá.

El a lanta bai, pasa su man suavemente asina na mi kara, i bai kumpra un pan mas pa mi kome. Mas ku klaro m’a keda wak’é kana bai pa mi wak su sankanan pasó ta parse mi ku mi tin ku bai pone renchi na su dede. Kualke muhé ku ta sòru pa un hòmber ta bon komé no ta kos pa laga bai.

El a bin ku dos pan mas, plùs dos kuki. Ai, m’a sinta kome ku masha plaser mes, miéntras e tabata wak mi kome ku un sonrisa riba su kara. Mi no por ninga, mi a sinti mi ‘verliefd’. Despues ku mi a kaba di kome e pan, mi a manda e kukinan tambe a abou, i mi a yam’é masha danki mes. El a puntra mi si e pan a baha bon. Mi a bis’é “Mas dushi ku nunka”. El a puntra mi si mi ke kome e otro tambe. Ma bis’é “Ai nò dushi, e ta bon asina.” Einan su kara a bira un tiki serio i el a bisami “Mi a kumpr’é kaba, pues komé”. M’a bis’é: “Pero dushi mi ta yen kaba, mi ta bon asina”.

E mucha a kue e pan push’é riba mi i ku un kara serio el a bisami “No ta tur ora bo ta zeur pa nos bai kome? Awèl wak pa bo kome tur e pan aki. Ban mira, kuminsá kome”. Esaki si a pone mi spanta!

Mi a kuminsá kome e di kuater pan tur spantá. Ora mi a kaba el a puntrami si mi ke mas. M’a bis’é “Nò dushi, plis, mi stoma ta yen yen aki.” E mucha a lanta tòg, i bai kumpra dos pan mas. Mi kier a lanta i kore bai lag’é, pero mi tabata tin miedu ku e lo a sali kore mi tras.

El a trese dos pan mas, kai sinta band’i mi, kuminsá pusha pan den mi boka. El a keda bisa mi “Kome, ban mira. N’ ta kome bo tabata ke pa nos bai kome huntu? Ha? N’ ta tur ora bo ta reklamá ku mi no tin tempu pa bo? Ata nos huntu awó, ban mira kome!!!!!”

Date at Subway 2

Mi mester a habri boton di mi karson pa mi por a manda un pan mas abou. Ora mi a kaba di kome esei, ainda e muhé loko ei tabata ke mi kome e otro. Pero mi no tabata por mas. M’a kuminsá pidié pordon. Ma bis’é “Despensa, pordon, sòri dushi, mi no ta hasié nunka mas”

Tòg el a obligá mi kome e di seis pan. El a keda grita mi den Subway ei. Tur hende a keda wak boka habrí. M’a pidi e hendenan pa yuda mi, pero e amiga di mi ei tabata mustra asina loko ku tur hende a haña miedu di dje. El a keda pusha pan den mi boka, bisami “Kome tur….ban mira, kou ku smak.” Mi stoma tabata na punta di rementá. Mi barika a keda tur di blas. Despues di esei e muhé loko a duna mi un sunchi, bisa mi soña kuné ora mi bai drumi anochi, i asina el a kana bai laga mi. M’a pidié p’e yuda mi lanta, e di ku mi “sòri dushi, mi tin purá.” El a bai laga mi asina gewoon. Ta ambulans mi mester a yama pa hiba mi kas.

Ora mi a yega kas, mi a yora. Nunka di mi bida un hende no a trata mi asina malu. Mi kurason tabata hasi doló, aparte di mi stoma i barika tambe. Mi a drumi hopi malu, yorando sin konsuelo.

Pero mi no por a laga e kos keda asina. Awe manera mi a lanta mi a yama e muhé loko ei i reklam’é, p’e no kere mes ku mi tin miedu di dje. Mi a zundr’é na telefon i bis’é “B’a kere ku e kos aki ta yuda drecha nos relashon? Despues di e sita mi a kere sigur ku nos lo a bai hasi sèks pashoná ku otro, pero no, b’a sali bai laga mi sin bira wak patras. Un hòmber mester di sèks, bo no sa anto? Anto despues di Subway, sèks semper ta baha bon. Bo ta kere ta pòrnada mi ta sinta papia ko’i kèns den bo kabes hinter ora, bisa bo kon dushi b’a keda ku kos? Ta pa mi haña sèks tòg?

Riba kual el a kontesta “Ai sòri dushi. Mi no a paga tinu ku bo tabata ke sèks tambe ku mi. M’a kere ta kome so bo tabata kier a kome. Si ta sèks bo ke, awe nochi nos ta bai sèks hinter anochi ku otro bon papi?”

M’a bis’é ta bon. Mi tabata tin gana di kibra kuné despues ku el a abuzá i humiá mi den Subway, pero ta parse ku awe nochi nos ta bai plakia kos. Su stèm tabata un tiki vengativo si, pero no ta nada. Mi tin sigur ku den sèks si e ta bai trata mi bon, i mi tin sigur ku awe nochi nos relashon ta bai drecha!

(Esaki ta un historia fiktisio i e no ta basá riba realidat. Bon ya, no kompletu. Si bo a gusta e historia aki, bo no por keda sin lesa “Awa, Habon ku Past’i Djente” kual ta un buki kargá ku historia nan fiktisio basá riba yen kos straño ku mi ta pasa aden diariamente. Algun di nan ta poko pika, pues kòrda lesa e buki ku un kùp ku eis band’i bo.)

DSCN2765

E persona riba e potrèt aki no tin nada di haber ku e historia ku mi a skibi ariba. E ta solamente mustrando bo kon aparensha di e buki ta, pa bo bai busk’é mañan mes na Mensing’s Caminada. No bai ‘link’ kos straño ku otro pa mi no haña hende ke bin choka mi mata. Bon ya….aunke e tin mag di choka mi, strangulá mi i bati mi ku tete den mi kara…..hehehe 😀

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.