Seis señal ku ta indiká ku un persona ta totalmente kla ku su èks!

Reading Time: 7 minutes

Mi no ta eksperto den relashon ni mi no ta pretendé di ta tampoko. Loke si mi ta hasi ta studia komportashon di hende riba un nivel sikológiko, i esei ta duna mi konosementu pa papia ku sertesa riba e tema.

Problemanan di relashon ta masha komun i tur hende a òf lo pasa den dje un dia. (Ku eksepshon di hendenan ku ta evitá di drenta un relashon pa miedu di problemanan di relashon.) Un di e problemanan ku hopi hende ta enfrentá ta e fase ora un relashon kaba. Tin hende tin problema pa pasa riba un èks di nan. Segun nan, nan no ta sinti nada mas pa e persona, pero nan komportashon ta bisa lo kontrario.

E señalnan ku mi ta bai duna bo aki por sirbi komo indikashon pa bo sa ki ora un hende ta totalmente kla ku su èks, plùs e ta indikashon ki ora un hende ainda no a pasa riba su èks. Tambe bo por uza nan pa tèst interes di un persona ku ta pretendé di tin interes den bo!

Ora un relashon tèrminá, tin diferente fase ku un hende tin ku pasa aden promé ku e por ta kompletamente kla ku e relashon. Pero hopi hende ta keda pegá pasó hopi bia nan ta karga un speransa. Pa kon chikí ku e speransa ei por ta, e ta pone ku bo no por pasa riba e persona.

Si bo tin speransa ku un persona lo por sea pordoná bo, òf ku e lo sinti bo falta, òf kualke otro kos ku lo pone ku bosnan lo bolbe bèk ku otro, pero di su parti bo ta ripara un òf mas di e señalnan aki, mi shon, ‘hisa pareu’. E relashon ei a pasa pa historia.

Indifference 11. Indiferensha
Esaki ta e promé señal i esun di mas fuerte. Un persona ku ta trata bo indiferente ta señal ku bo no ta nifiká nèt nèt nada p’e. Lo bo preferá pa un persona trata bo malu, i no trata bo indiferente. E trato aki básikamente ta nifiká ku pa e persona sea bo eksistí òf no eksistí, ta tantu bal.

(Tin hendenan den relashon ta uza trato indiferente pa kastigá nan pareha. Esaki ta bo derechi, pero tene kuenta ku e no ta yuda drecha bo relashon.)

2. E ta trata bo normal, pero e ta distante
Manera mi a menshoná awor ei, lo bo preferá pa un hende buska guera ku bo, i no dunabo tratonan indiferente. Si e ta trata bo normal , pero ku un aktitut distante, tambe ta nifiká meskos. Básikamente bo no ta nifiká nada mas pa e persona ei. E ta trata bo nèchi pa ser kortes, pero ne mes momentu e ta distante, pasobra e no tin kunes ku bo mas. Bo no ta lanta niun klase di sintimentu mas den dje.

3. E ta kontesta bo mensahenan lat
Esaki ta simpel, i mi ke pa esaki ta bon kla. Tin hopi hende ta pretendé ku ora nan ta drùk, nan no tin tempu pa e persona ku mas nan stima. Pensa un ratu riba un hende drùk ku a konosé un persona nobo. Si e ta interesá den dje, bo ta kere e lo bis’é ku e no tin tempu p’e, pasó e ta muchu drùk? No tòg? Klaro ku un hende por ta drùk, pero ora bo tin interes pa un hende, bo ta traha tempu p’e. Tene kuenta ku tin hende ta kontesta bo lat pa malu tambe. Nan ke manda señal ku nan no tin tempu pa bo, pero esun ku ta tratando bo indiferente, no ke tin tempu pa bo ètòl, pasó simplemente bo no ta nifiká nada p’e.

Indifference 44. Nan no mester prueba bo ku nan ta felis
Ora un persona sali for di un relashon, pero ku ainda e no a pasa riba e relashon, konstantemente e lo ke prueba na e èks ku e ta felis sin dje. Atrobe, trato indiferente ta e promé indikashon ku un persona no tin kunes kubo. Si un hende ta blo keda post potrètnan òf tira puña pa sea e èks òf e pareha nobo dje èks ta señal ku e no a pasa riba e relashon ainda. No ta nifiká ku e ke e persona bèk, pero en todo kaso tin algun sintimentu ainda ku e no a pasa riba dje, sino pa ki dònder e ke prueba e persona ku e ta felis sin dje òf laga? Tene kuenta ku te asta sintimentu di rabia ta sintimentu i ta indikashon ku tin algu ta molostia e persona ainda!

5. E no ta inisiá kombersashon
Un hende ku ta interesá den un otro persona semper lo buska maneranan pa inisiá kombersashon. Si semper bo ta papia ku un hende, e ta kontesta bo di forma masha kortes, pero nunka e persona no ta inisiá un kombersashon kubo, ta señal ku bo no ta importante p’e. Atrobe, sea bo tei òf bo no tei, ta tantu bal.

Indifference 3

6. E ta buska otro relashon pa drenta den dje
Ora un persona sali for di un relashon, e mester di tempu pa e kura. Si e drenta mesora den otro relashon, loke nan ta yama “rebound”, ta señal ku e no a pasa riba e relashon anterior. E ta nèt buskando algu pa yud’é dil ku su sintimentunan of kisas pa e no sinti soledat. Tin hendenan ku ta sufri di otro problemanan sikológiko por ehèmpel tin hende tin miedu di ta òf di keda nan so, i tin hende ta uza relashon pa yuda nan dil ku otro problemanan ku lo a originá for di nan infansia. E hendenan aki manera un relashon di nan tèrminá, djis despues nan ta den un otro. Pero tur ta relashonnan disfunshonal, pa motibu ku nan no ta tuma nan tempu i buska algu di kalidat i ku lo hasi nan felis. Esaki ta hopi komun serka hendenan ku mester di un tipo di afirmashon pa nan por funshoná, ta preokupá ku nan imáhen públiko òf tin falta di intimidat!

Algun di e señalnan aki bo por aplikanan tambe pa bo sa si un persona ta interesá pa e tin algu ku bo òf no. Por ehèmpel un hende ku ta bisa bo ku e ke tin algu kubo, pero e ta pretendé di ta drùk, bo por kuminsá na saka bo sòm. Meskos ku hende ku no ta inisiá kombersashon kubo, òf ta kontesta bo hopi kòrtiku. Tur ta señal di falta di interes. Aunke por ta posibel ku e persona ta wantando algu aden, òf tambe ku e hende no tin un dònder di papia di dje, pero asta asina, si un hende tin interes den bo, e lo papia di kualke ko’i kèns, basta e logra haña bo atenshon!

Evitá doló di kurason i no keda pèrsistí riba un hende ku ta duna bo trato indiferente. Manera semper mi ta bisa, no bai tras di palabra di hende, sino tras di nan akto nan. Un hende por bisa bo ku e ta stima bo di aki te luna, pero si nunka e no tin gana ni tempu pa dediká na bo, probablemente e no sa kon leu luna ta fo’i mundu, òf kisas e tin otro definishon pa stimashon!

Den e buki ‘Kibra Hacha’ lo bo haña mas splikashon i tepnan ku lo por yuda bo den bo relashon i pa bo konosé bo mes, i sa dikon bo tin e habito di keda drenta ku e mesun tipo di hendenan ku bo a bin ta skohe te ku aworakí!

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook

Leave a Reply

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.