9 motibu dikon bo tin ku frei un hende ku gusta lesa!

Pa esnan ku no sa, ku frekuensha mi sa bishita Biblioteka Nashonal Kòrsou pa buska bukinan pa lesa pa asina improvisá mi arte di skibi. Riba un djaluna mèrdia, mi a drenta Biblioteka i bai sinta wak televishon un ratu (Por sierto, den biblioteka tin un TV ‘flatscreen’ mas grandi ku mi outo. Mi a manda mail pa e direktora pidiendo e TV, pero ainda e no a kontesta mi. Mi ta bai mand’é un ‘friendly reminder’ wak ki ta kiko!)

En todo kaso, sintá ta wak TV ku mi dos bukinan ‘Kibra Hacha‘ i ‘Awa, Habon ku Past’i Djente‘ riba mesa, un yùfrou ta pasa i puntra mi ta kua e bukinan ei ta. Mi a splik’é ku ta bukinan ku mi a skibi. E di ku mi “Serio? Ta abo a skibi e dos bukinan ei?” M’a kontest’é “Si”. El a bisami “Bo sa, na vários okashon mi sa bin sinta na Biblioteka pa wak ken interesante mi por dal den dje. Vários hende muhé ta preferá bai klup, bar, fiesta di Blaq Chyna bai ‘twerk’ ku kos pa sosialisá, pero ami nò. Ami ta preferá sinta na Biblioteka lesa un korant i na vários okashon m’a konosé hendenan hopi interesante akinan. Mi gusta konosé hende hòmbernan ku ta lesa bo sa?”

M’a bira puntr’é: Dikon?

El a splika: “Segun enkuesta i statistiknan, lesamentu ta birando ménos popular dia pa dia. E sistema ku mundu ta kambiando ta pone ku hende no ta lesa kasi mes.

Si bo wak Facebook aworakí por ehèmpel, ántes tabata tin hopi ko’i lesa. Aworakí Facebook ta tur na video, anto awó nan ta kuminsá ‘play’ sin ku bo mishi ku nan.

Twitter ku ta hopi gustá i uzá bou di e merikanonan tin un límite di letra ku bo por uza pa evitá ku bo ‘tweets’ nan ta bira largu i pone ku e hende tin ku lesa hopi. Riba Whatsapp kasi niun hende no ta skibi mas. Ta ‘voicenote’ nan ta manda.

Segun investigashonnan hendenan ku ta lesa hopi, un dia lo por bira bon lider pero tambe un bon pareha. Awó si lesamentu ta den dekadensia pronto nos lo no tin ni hendenan kapas pa liderá, ni hendenan pa forma pareha kuné, pasó ta yen hende kabes bashí tin ta kana rònt.”

Mi a puntr’é: “Ki benefisio tin den frei un hende ku ta lesa hopi?”

Riba kual el a duna mi un splikashon interesante i ekstenso:

DSCN2912

Desi Merien; Awa, Habon ku Past’i Djente

“1. Personanan ku ta lesa hopi tin kos na tinu pa papia di dje
Nunka bo no a bai un ‘date’ ku un persona ku ta papia ko’i loko so? Bo no por drenta den profundidat di niun tema ku n’e pasó, nada e no sa di dje. Un persona asina, si e tin e bunitesa di pafó, t’esei so e por broma kuné, anto si un dia e pèrdè esei, el a kue awa. Hende su persepshon di loke ta bunita ta kambia tambe. Pero un persona ku ta invertí tempu den su desaroyo intelektual i personal ta bira un persona ku nunka lo bo no ta kansa di dje. Semper lo bo por siña kos for di dje. E lo keda deskubrí kosnan nobo, i kòmbersashonnan entre bosnan lo ta mas interesante tur dia di nobo.

Un persona ku ta lesa hopi, por konektá bon ku hende tambe. Dor di konektá ku diferente personahe di diferente buki, bo ta stimulá bo IQ emoshonal, kual ta duna bo mas abilidat pa konektá ku hende rondó di bo. Pues asina bo por logra haña un ‘chemistry’ mas lihé.

2. Personanan ku ta lesa hopi ta amplia nan vokabulario
Lo bo ke frei un hende ku ta papia stail di kaya hinter dia? Òf kisas un hende ku su vokabulario ta meskos ku tin un mucha di skol básiko? Òf lo bo preferá un hende ku ta uza un palabranan ku ta fasiná i stimula bo seleber?

No tin duda ku mas bo lesa, mas bo ta ekspandé bo vokabulario. Lo bo por ekspresá bo mes verbalmente mas mihó, pero tambe emoshonalmente. Dor di lesa hopi, bo ta bin desaroyá abilidatnan pa ekspresá bo pensamentu i deseonan mihó, i esaki lo yuda bo konektá i komuniká ku bo pareha mas mihó.

3. Personanan ku ta lesa hopi tin un perspektiva mas amplio
Dor di lesa hopi bo ta biaha bai tur kaminda, bo ta lesa pensamentu, sintimentu i kòmbersashonnan di diferente hende, i esaki ta duna bo e abilidat pa mira e kosnan di diferente perspektiva. Esaki lo yuda bo den bo relashon pa resolvé konfliktonan di un manera mas madurá, enbes di keda zundra i pleita riba kosnan ku no tin sentido, i tambe bo por hinka bo mes mihó den sapatu di bo pareha pa bo por komprondé su punto di bista.

4. Personanan ku ta lesa hopi ta hiba mihó kombersashon
Usualmente hende gusta papia ku hendenan ku ta lesa hopi dor di nan abilidat pa kombersá i nan eskoho di palabra. Nan ta personanan ku por papia di diferente tema i tin un konosementu amplio. Traha nètwèrk i konektá ku otro hende ta bira algu fásil pa nan.

Reading is sexy 105. Nan ta mas relahá
Segun estudionan lesamentu ta yuda redusí strès, konsekuentemente un hende ku ta lesa hopi tin ménos strès, i e ta mas relahá. Segun estudionan, kompará ku skuchamentu di muzik, kana, bebe te i sobrá aktividatnan pa redusí strès, lesamentu ta esun mas efektivo. (Esaki mi mes por konfirmá.)

Si bo tin un pareha ku ta un persona relahá, ta pone hinter bo relashon kana trankil, kompará ku un hende ku ta hinter dia hanshá!

6. Personanan ku ta lesa hopi sa mihó ken nan ta
Nunka b’a yeg’i hañabo den relashon ku un persona ku ainda ta buskando su mes? E no sa ken e ta, ni e no sa ki baina e ke? Wèl, tin bia ora bo ta lesa, ta manera ku bo ta poniendo un spil bo dilanti, i bo ta mira òf ripara kosnan di bo mes ku bo no tabata sa, òf ta konsiente di dje. Lesamentu sin duda algun, ta siña bo konosé bo mes mihó. Bo ta bin sa ken bo ta, ken bo no ta, kiko bo ke, i kiko sigur bo no ke. Na momentu ku bo siña konosé bo mes mas mihó, bo ta sa tambe kiko bo ke i ta spera di un relashon stabil.

7. Personanan ku ta lesa nan mente ta keda skèrpi i aktivo
Si bo tin un pareha ku su mente ta zueif, bo relashon tambe lo zueif sam sam kuné. Lesamentu ta pone ku bo ta bira mas energétiko, positivo i ku konfiansa den bo mes. Ademas di esei, lesamentu ta laga bo enfoká mas mihó, i ta laga bo mente keda aktivo i skèrpi, kual intelektualmente ta subi bo atraktividat.

8. Personanan ku ta lesa ta fásil pa tene na kas
Mas tantu bo pareha ta na kas, mas tempu bo tin pa pasa kuné, ménos chèns e tin pa kòrta orea. Un persona ku gusta lesa, lo preferá keda kas lesa algu trankil, enbes di bai kore kaya, bebe na bar, papia disparate i gasta sèn na kosnan sin sentido.

(Ora e ta na kas, kòrda dun’é su espasio si, pasó si bo keda 24/7 riba dje, e ta kapas di bai laga bo p’e buska un lugá trankil p’e por sinta lesa.)

9. Personanan ku ta lesa hopi ta mas intelektual
Tene kuenta ku aparensha i smak di hende ta kambia. Si bo ta buska hende pa frei, abase di nan aparensha so, pronto lo bo kansa di e persona ei, pasó e persona por kambia, i bo smak tambe por kambia. Inteligensia i kapasidat mental di hende por solamente krese. (Te despues di 50 aña, e ta kuminsá baha bèk gradualmente, pero p’e tempu ei, ya bo bo n’ tin kunes mas.)

Segun investigashon, personanan ku ta lesa hopi ta pensa mihó. Esaki ta debí ku lesamentu ta desaroyá bo abilidat pa rasoná i resolvé problema. Tambe nan ta bisa ku lesa algu ku bo no ta di akuerdo kuné tin impakto riba e manera ku bo ta pensa. Tantu lógikamente komo kreativamente.”

Tur esaki e yùfrou a konta mi den apénas un ora ku mi a kombersá kuné, i mesora m’a ripara ku e ta un ‘Sapioseksual’. Esei ta e denominashon ku nan ta uza pa hendenan ku ta sinti nan atraé na inteligensia di hende. Anto ta p’esei kada bes ku mi haña un chèns mi ta bishita Biblioteka Nashonal Kòrsou, pa motibu di e kantidat di Sapioseksualnan ku mi ta topa einan.

Si bo tambe ta un Sapioseksual, ki dia nos ta ban lesa algu i kombersá na nos Biblioteka Nashonal?

DSCN2913

Desi Merien; Kibra Hacha!

Kibra Hacha i Awa, Habon ku Past’i Djente ta dos buki fásil pa lesa, i ku sigur lo yuda bo relahá, amplia bo konosementu riba diferente aspekto di bida, prinsipalmente riba aspektonan rondó di komportashon humano i relashonnan ku e hende ta hiba ku demas personanan rondó di dje. Plùs si hende pasa mira bo ta lesa nan, nan lo mira bo dies bia mas atraktivo ku bo ta!

Aparte di por kumpra e bukinan aki na Mensing’s Caminada, kòrda ku ámbos buki ta optenibel na Biblioteka Nashonal Kòrsou tambe. Bira miembro i fia nan pa kuantu tempu ku bo ke, basta bo hiba nan bèk, pasó tin mas hende ku ke fia nan. No hasi kos di egoista!

Danki na Desi Merien pa e tremendo kombersashon!

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.