Mi promé eksperensha den un misa!

Reading Time: 7 minutes

(Atvertensha: si bo ta religiosamente sensibel, por fabor no lesa e historia aki. Kòrda mi a atvertí! No lesa kaba bin reklamá!)

Esnan ku ta sigui CuckooPress regularmente por a nota un par’i dia ku mi tabata ousente. Esei tabata debí na algun problemanan personal, emoshonal, sosial, finansiero, familiar i sikológiko ku mi tabata konfrontando.

Esei a pone ku mi a papia ku algun hende ku a konsehá mi bai misa djadumingu i pidi pa iluminashon djariba. Pues esei mi a hasi. Mi mester bisa si ku nunka mi no a yeg’i bai misa, pues e eksperensha di ayera tabata kompletamente nobo p’ami.

Komo ku hende a informá mi ku den misa ta trahe formal nan ta bisti, mi a dal mi un ‘Tuxedo Shirt’ ku un sapatu pretu bon lombrá i bai un misa katóliko.

Church day 1Remarkabel tabata ku sobrá hendenan den misa tabata masha kasual bistí, ku kèts na pia, pèchi riba kabes etc. Mi a asta nota un kabayero den su shòrt i un ‘rack’ di tènis den su man. Probablemente despues di misa e lo tin un wega interesante di tènis pa bai partisipá na dje. Tabata remarkabel tambe ku den misa tabata tin par di muhé bon dushi, ku saya pèrtá bistí, string ta marka patras, anto nan tetenan tabata den pleno eksposishon. Pero mi no a keda wak nan. Mi a bai misa ku un meta i esei mi kier a mantené mi mes na dje.

church day 4Misa a kuminsá 9or en punto. Pa 9:15 ya kaba mi tabata sinti mi laf. Mi a purba tòg na mustra eksitá pa e eksperensha i mi tabata ansioso pa mira resultado di esei! Mi tabata sintá riba un banki di palu duru ta keda wak rònt, miéntras pastor tabata papia un kos ku mi no tabata komprondé. Remarkabel tabata ku e otro hendenan aparentemente si tabata komprondé i nan tabata skucha ku mashá atenshon. Den sierto momentunan nan tabata kontestá pastor manera kos ku e pastor tabata hipnotisá nan ku palabra, i tur hende tabata duna e mesun kontestanan den un stèm robótiko. Mi no por gaña, m’a sinti mi basta straño mei mei di nan.

Banda di mi tabata tin un señora den su 50 aña, bistí ku un shimis ku ta kuminsá na su garganta bai kaba te na suela aya, anto ku asina un sombré masha grandi mes riba su kabes. Mi tabata puntra mi mes si e no ta sinti kalor? Pero e kontesta tabata opvio pasó e tabata wayando ku un pida karton i miéntras pastor ta papia, e señora tabata keda bisa “Amèn, Amèn, Amèn”. M’a sigui sinta wak rònt, m’a mira un buki hinká patras di e lomba di e banki. M’a kue habrié na un página i mira e siguiente frase skibí “ i Señor lo kumpli ku tur bo nesesidatnan”. Einan m’a dal e buki sera, pasó mi tin yen nesesidat i te ainda niun no a keda kumplí.

Despues di a pone e buki bèk mi wowo a kai riba un tapeit kòrá ku tin ta kologa patras na lomba di banki. M’a kue e tapeit, keda studi’é. Den mi mes mi a pensa ku e tapeit aki ta bon pa tin den outo pa ora bo haña flèt tayer bo por sinta abou riba dje, sin ku bo ta susha bo paña. Masha dia mi tabata buska algu asina, anto ken por a pensa ku den misa mi ta haña un. M’a kue e tapeit hink’é den mi ‘rugtas’. E señora ku sombré grandi a bira wak mi ku un kara i bisa mi “Ta kos pa bo hinka rudia riba dje”. M’a bis’é “Amèn, Amèn, Amèn”.

Segun misa ta bai, m’a kuminsá haña hamber. Barika ta gruña masha feros. M’a keda bira rònt, wak unda por tin un kantina òf kualke hende ku ta bende ‘hotdog’ den misa, pero mi no a mira nada. Pa mas sigur m’a puntra e señora ku sombré grandi si no tin un kantina ku ta bende ‘hotdog’ òf pan ku krokèt den misa. E señora a wak mi ku un kara i chuw mi di un forma masha fresku.

Pa mi suerte m’a mira pastor ta kome i bebe algu dilanti tur hende ei. M’a pasa lenga na mi boka i lanta bai mesora serka pastor. Pastor no por kere ku e so ta sinta kome den misa. Ta ki esei? Nèt e ora ei, tur hende tambe a lanta bai para den rei pa bai tuma ko’i kome serka pastor. Ku pasenshi m’a para den rei pa mi yega serka pastor. M’a purba rèk kabes wak ta kiko pastor ta pone den e hendenan su man, i algun ta tum’é dirèkt den boka, pero mi no por mira ta kiko. M’a pensa ku lo mester ta algu bon si, pasó ta tur hende ta tuma i despues hasi un señal straño ku nan man. Mi ta imaginá mi ku ta asina nan lo ta yama danki. Ora m’a yega serka pastor m’a habri man, i pastor a pone un pida kos rondó chikí flaku seku den mi man.

Church day 3M’a bisa pastor ku e kos ei no ta yena mi stoma. Pastor di forma masha brutal a pusha mi un banda i bisa mi ku mi ta stroba. M’a bira hasi un señal ku pastor wak si asina e ta komprondé, pero el a simplemente ignorá mi. M’a kue e kos hink’é den mi boka. Wèl, mi no sa ta ken ta e kòki den misa, pero e tin ku haña ‘onstlag op staande voet’. Masha malu mes e ko’i ta. Pero pa motibu di hamber, m’a dal un buèlta bolbe bai para den rei pa tuma un mas. Ora m’a yega dilanti pastor, el a bolbe pone un pida dje kos rondó flaku seku den mi man. M’a pidi pastor si mi no por haña un mas. Sin puntra nada pastor a duna mi un mas i despues mi a puntr’é: “Awó pastor, bo tin un tiki manteka i un òns di keshi pa mi pone mei mei dje kos aki?” Pastor a bolbe pusha mi hala mi un banda. Si ta asin’aki ta hende religioso, bien bèrdè e mundu aki no por ta mihó.

Sintá ku hamber den misa mi ta puntra mi mes ta ki ora Señor lo kumpli ku mi nesesidatnan anto? Einan e hendenan a lanta para kuminsá kanta i baila. Remarkabel tabata ku algun tabata tin nan dos mannan den laira, manera kos ku nan ke risibí algu ku lo kai fo’i den laira. Pues mi tambe a hasi meskos i keda wak den laira wak si algu ta bin abou. N’e momentu ei e señora ku sombré grandi band’i mi a pasami un makutu yen yen di sèn. Mi a keda kompletamente asombrá. N’e momentu ei m’a hisa mi kabes na laira i bisa “Porfin”. M’a kue e makutu, basha tur e sèn den mi tas, duna e señora e makutu bèk i bis’é “masha masha danki”  El a bira bisami “Yònkuman, Señor ta mira bo”. M’a bis’é “Amèn, Amèn, Amèn”!

Church day 5Den e makutu tabata tin sufisiente sèn ku mi por a pasa kumpra un pan kipashi ku belèg pa mi kome, paga Aqualectra i UTS, plùs a sobra sèn pa duna mi yunan ‘zakgeld’.

Mi a konta un amigu di mi ku tambe ta pasando den momentunan difísil, loke a pasa mi i e di ku djadumingu aki e tambe ta bai misa. Mi ta spera e komportá su mes pasó e amigu aki gusta hasi kos ku laga mi kara na bèrgwensa.

(Esaki ta un kuenta fiktisio i no ta basá riba realidat. Propósito di e kuenta aki lo mi lag’é na bo propio persepshon!)

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook

Leave a Reply

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.