Si bo no gusta lesa, ta pasó bo no sa di e 10 benefisionan aki!

Reading Time: 9 minutes

Bo gusta lesa? Si bo kontesta ta “nò”, bo sa ta dikon? Bo sa kuantu kos bo ta pèrdè kada dia ku pasa ku bo keda sin lesa algu?

Mayoria hende ku no gusta lesa probablemente lo a klasifiká lesamentu komo algu no plasentero. Tin bia e tin di haber ku flohera tambe. Pero flohera ta algu natural di hende. Mayoria bia ora un hende ta floho, ta pasó e ta wardando energia p’e uz’é mas despues. Pues e hende ta preferá warda su energia i uz’é na algu otro ku no ta lesamentu pasó simplemente e no ta mira niun benefisio ku lesamentu tin p’e. Ántes ami a klasifiká lesamentu komo algu no plasentero pa motibu ku nan tabata obligá mi lesa kosnan ku mi no ta interesá den dje. Pero ora ku m’a deskubrí tópikonan di mi interes, lesamentu (i skibimentu) a bira un di e kosnan ku mas plaser mi tin den dje, ku mas mi ta siña di dje, i tambe e kos ku mas influensha tin riba mi bida!

Kada hende tin un tipo di smak. Si ami gusta lesa kosnan di siensia, no ta nifiká ku bo tambe lo gusta meskos. E smak aki ta bai asina leu te ku bo por gusta e forma di skibi di sierto outornan spesífikamente. Ta abo tin ku tuma bo tempu pa skohe e lokual ku abo ta gusta pa bo hinka bo tempu den dje. Si bo ta bisa ku bo no tin tempu, e kos ei ta nada mas ku un èksküs!

Awendia tin yen medionan sosial i programanan pa ‘chat’ ku tur dia nos ta lesa riba nan. Pero asina nos mira un pida teksto largu, ya kaba nos ta pensa ku e ta bai tuma muchu tempu pa lesa, pues nos ta preferá warda nos energia i gast’é na kontestamentu di ‘app’, Facebook, Twitter, Instagram i te asta buska hende pa papia kuné ora bo ta sinti bo laf òf pa mata tempu. Ke men kuent’i bo no tin tempu ta simplemente un èksküs i bo sa esei tambe!

reading is sexy 2Awó si bo no sa ki benefisio òf ganashi hende tin ku lesamentu, pèrmiti mi splika:

1. Lo bo deskubrí un lugá sigur pa bo skonde di tur mal tempu
Tur hende den nan bida lo eksperensia momentunan difísil, strès, depreshon òf un momentu laf ku no tin nada di hasi. Algun hende ta skohe pa uza droga i alkohòl pa hui for di e momentunan ei. Pero esei no ta nesesario. Si bo tuma bo tempu i skohe algu pa bo lesa, lo bo ripara kon bo ta bai den un mundu totalmente diferente kaminda ta abo ta e doño, e rei i e emperador. Ta abo lo dirigi bo mente den e mundu ku bo ke ta. No tin niun hende ku lo huzga bo pensamentu i bo imaginashonnan. Bo ta sinti bo kompletamente liber pa pensa loke bo ke. Anto ta ken lo bai huzga òf papia malu di bo, si bo ta lesando un buki?

2. Lo bo bira parti di un komunikashon sin frontera
Diferente hende ku a siña òf eksperensha diferente kos a dokumentá tur esakinan pa asina nan por pasa nan eksperensha over p’abo. Riba e mundu aki tin asina tantu kos ku bo no sa di dje i tin asina tantu kos ku lo bo no por eksperensha durante bo estadia na mundu. E mihó manera pa bo sa mas, ta dor di lesa. Lesa loke otro hende di diferente pais, nashonalidat, rasa, kultura i pensamentu ke komuniká ku bo. Habri bo mes pa skucha nan!

3. Lo bo mehorá bo vokabulario di e manera mas fásil ku tin
Lesamentu ta e mihó manera, i e manera di mas fásil pa bo amplia mehorá bo vokabulario. Bo ta kuminsá skibi mas na drechi, i uza palabranan ku un tiki mas klase. Bo frasenan lo ta mas komprendibel pa otro hende, i tambe lo bo por manda hende kaminda nan a sali diplomatikamente!

reading is sexy 84. Tempu di espera na dòkter, banko, reinan largu etc lo bira un plaser
Aunke ami lo preferá sali na kareda kore bai, pero si mi sa ku mi tin ku bai ‘kampeer’ serka dòkter por ehèmpel, mi ta bai ku algu di lesa kaminda mi ta bai den un otro mundu ku no konosé oloshi. En bes di sinta sakudí pia pa falta di pasenshi, pega soño, ronka saka baba den hende, òf asta kue fadá bai bin, ku chèns ku bo bùrt ta pasa durante bo ousensia, bai ku algu di lesa. Wardamentu lo no por ta mas plasentero!

5. Bo por desaroyá bo inteligensia emoshonal
Esaki ta dependé di kiko bo ta lesa. Si bo ta lesa kosnan di outo, teknologia etc, mi no ta kere e lo traha riba bo inteligensia emoshonal. Pero hopi outor ora nan ta skibi, nan ta pasa over tur nan sintimentu i emoshon den lokual nan ta skibi. Esun ku ta lesa lo risibí esei. Si bo ta lesando materialnan ku ta konta di rasismo, deskriminashon, abusu, pobresa etc, bo ta bin sinti presis loke e outor ke bo sinti i di e forma ei desaroyá bo inteligensia emoshonal, kual ta hende su abilidat pa komprondé, interpretá i analisá emoshon di hende plùs di bo mes.

6. Lo bo ta mas kreativo
Hende hòmber por lo general no ta masha kreativo. Hende muhé un tiki mas. Pero segun mi, hende muhé ta lesa mas ku hende hòmber tambe.

reading is sexy 7Lesamentu ta krea un base di konosementu ku ta yuda krea konekshonnan den bo seleber ku ta hasi bo hopi kreativo. Mi konosé hende ku mi por pidié un idea, i den sinku sekònde e ta duna bo ideanan genial i fantástiko. Esei ta ora bo mente ta aktivo i konstantemente ta risibí informashon di diferente parti, i asina e por saka algu di su propio kreashon.

Pues tur hende por ta kreativo. Pero ta abo tin ku duna bo fantasia kuminda p’e por traha su ‘database’ di konosementu, i ora abo mester di algu, e ta djis bai kue algun ingrediente den su ‘database’, traha un meskla i konsebí algu di su propio kreashon.

Anto no tin nada mas dushi, ora bo mira algu di bo propio kreashon. Bai hasié bo ta sa!

7. Lo bo siña HOPI kos
No ta importá kiko bo ta lesa. Di kada kos ku bo lesa bo por siña algu di kultura, relashon, historia, miedu, siensia humano, sikologia, filosofia, guera, spiritualidat, teknologia etc. E loke ku bo por siña ta infinito.

Anto ora bo tin sufisiente konosementu òf eksperensha propio den un materia, bo por skibi bo propio buki. Tin hende ku den nan bida a pasa den asina tantu kos, ku nan lo por skibi un buki ku lo por siña otro hende kosnan di bida sin ku personalmente bo mester a pasa aden!

8. Lo bo deskubrí kuantu kos bo NO sa
Esaki t’e parti ku mas ami gusta. Mas bo lesa, mas bo ta sa. Anto mas bo sa, mas bo ta bin ripara kon ignorante bo ta. Anto ta esei ta duna ami gana di lesa mas i mas.

Tin bia bo ta kere ku bo ta vèrsá den un materia òf aspekto di bida. Te ora bo kuminsá lesa i bo ta bin mira yen kos mas ku bo no tabata sa di dje. Mas bo sigui lesa mas bo ta bin haña diferente opinion, perspektiva, informashon i análisis di e tópiko.

Tin asina tantu kos ku mi no sa di dje, i asina tiki tempu pa mi purba siña mas tantu kos posibel.
Mundu ta konsistí di asina tantu kos ku un bida so no ta sufisiente pa eksplorá nan tur. Via lesamentu bo por eksplorá mas tantu posibel, pero asin’ei mes un bida so no ta yega.

Tin asina tantu kos ku mi ke lesa i siña ku tempu no ta yega. Pues mi no ta komprondé kon un hende por bisa mi ku nan no gusta lesa. Ohh……klaro, pasó nan no sa ta kiko nan ta pèrdiendo!

Serious male student reading a book9. Lo bo siña uza bo imaginashon i ripara ku bo no ta straño manera bo a pensa
Ora bo lesa, bo ta lesando kreashon di un otro hende su imaginashon. Segun bo ta lesa, bo imaginashon mes ta kuminsá traha.

Nunka ku bo tabata lesando algu, bo no a haña un tremendo idea? Bo a duna bo imaginashon energia pa e drai riba su mes. Imaginashon di hende tin ora ta bai hopi leu. Esun di ami no konosé límite. Pero tin bia bo ta imaginá sierto kosnan ku bo no por papia ku tur hende, pasó nan lo haña bo straño.

Mi tin sigur ku tin un òf mas hende ku lo tin mesun imaginashonnan ku bo òf algu den mesun direkshon. Mas bo lesa, mas bo ta sa ku bo no ta straño. Por ehèmpel, si mi tin gana di bai biba den mondi i kana den djòki mané Tarzan, no ta algu ku mi por papia ku ken ku ta, pasó mayoria hende tin gana di biba den kas ku èrko, muebel, televishon ‘flatscreen’ etc. Lo mi sinti mi hopi straño di tin otro deseo. Pero na kualke kaminda na kualke otro parti di mundu tin un hende ku mesun imaginashon ku mi, i asta tin hende ku ta bibando e soño ei. Nan tin un kas den palu den un mondi, i nan ta bula di palu pa palu riba un kabuya manera makaku!

Bida no tin un standarte. No ta pasó un gran kantidat di hende ta hasi algu, ta nifiká ku bo tambe tin ku hasi meskos. Esnan ku yama bo “straño” ta pasó nan no konosé otro. Nan konosementu ta limitá na solamente e kosnan ku nan a eksperensha!

DSCN291010. Lo bo lesa ‘Kibra Hacha’ i ‘Awa, Habon ku Past’i Djente’ te puntra mi ki dia mi ta skibi un buki mas
E bukinan “Kibra Hacha” i “Awa, Habon ku Past’i Djente” mi a skibi nan prinsipalmente pa e hendenan ku no sa kiko ta e benefisionan di lesamentu. Nan ta skibí di tal forma ku un hende ku no sa lesa buki, lo hañ’é ta lesa e bukinan aki den dos dia òf ménos, aunke mi a pidi pa no kaba di lesanan asina lihé. Pero kuriosidat di hende ta kos ku bo no por bringa kuné. Asina bon e buki nan ta.

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook

Leave a Reply

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.