Kon bin preis di gasolin ta bahando?

Reading Time: 7 minutes

Último lunanan aki preis di gasolin i diesel a baha faborablemente pa outomobilistanan. Hende ta bira kontentu kuminsá papia, diskutí ku otro, i entre otro diskutí riba e motibu pa kual preis di gasolin ta bahando.

Entre e motibunan ku mi a tende ta:

“Paso Chavez a muri, i Maduro ta mas bon gai.

“Paso elekshon ta den porta.”

“Paso Schotte a menasa Asjes ku e ta feita tur su sejasnan si e no baha preis di gasolin.”

“Paso no tin guera den temporada di Pasku!”

Wèl, mi tin sigur ku den temporada di Pasku, tur sòldat a tuma un vakashon i bai kas bai kome ham ku sùlt i pékele ku nan famia, anto Yanüari nan ta kuminsá bringa atrobe, pero nò……esei no ta e motibu. Si Schotte k’e feita Asjes su sejasnan p’e, no ta nada nobo, pues esei tampoko no ta e motibu.

Manera nos tur sa, òf mi ta suponé ku bo sa anto, gasolin i diesel ta derivado di petroli (krudo).

Tin diferente tipo di krudo. Si bo tira un bista djis den banda aki, bo ta mira 2 tipo di preis di krudo. WTI ( Western Texas Intermediate) i Brent Crude. Kada un ta 2 tipo di krudo diferente. Un ta mas diki k’e otro, esun ta smak dushi, e otro ta un tiki mas salu etc. (Ami no sa kua ta kua. Nunka m’a yeg’i traha ku petroli, pues mi no sa dikon lo bo ke bai mi tras.) Pero en todo kaso, kada un tin un preferensha mas haltu ku otro, dependé kon diki e ta, kuantu sulfur e tin etc. Por ehèmpel ta mas fásil pa prosesá krudo ku tin un nivel abou di sulfur, kompará ku un ku tin hopi sulfur. Krudo liviano tambe ta preferibel kompará ku esun diki.

Di unda e petroli ta bin tambe ta hasi diferensha riba e preferensha di e kumpradó. Nan ta bisa ku krudo saká for di laman tin mas preferensha ku esun ku nan ta saka for di tera debí ku e ta mas barata pa logra hiba su destino. Probablemente lo tin mas faktor ta hunga ròl riba preferensha di e kumprado, pero ami no sa……nunka mi no a yega di kumpra petroli. Petroleum Jelly so m’a yega di kumpra ( Vaselin), pero esei mi ta hañ’é dirèkt den supermarket òf botika!

En todo kaso, kumpradónan di petroli i tambe spekuladónan mester di un manera fásil pa balorá kalidat i ubikashon di e petroli. Pues einan nan ta uza e tipo di referenshanan aki ku nan ta yama “punto di referensha” (Benchmarks). Entre esnan mas usá ta Brent, WTI i Dubai/Oman.

Si bo a siña ekonomia na skol, bo mester a haña e teoria di preis i demanda. Si bo no a hañ’é, ta pasó sea bo no a paga tinu den klas, òf bo no a skohe ekonomia òf bo no a bai skol. Pero no ta nada.

Básikamente mas demanda tin riba un produkto, mas e preis di e produkto ta subi. Anto na otro banda di demanda tin suministro, òf oferta. Mas tantu suministro/oferta di un produkto tin, mas e preis ta baha. (Bo mester sa e regla aki fo’i kabes.)

Debí na e dinámika di demanda i oferta riba krudo, e preis di kada punto di referensha ta kambia kontinuamente.

“Brent Blend” ta referí na krudonan ku ta keda saká for 4 sitio diferente i ta konta pa aproksimadamente dos tersera parti di kontraktnan di krudonan kual ta hasi esaki e punto di referensha mas uzá na mundu.

“WTI” ta krudonan ku ta keda saká for di posnan na Merka. Merka tin e mihó kalidat di petroli, kual ta esun ideal pa rafiná i traha gasolin for di dje, pero e echo ku e petroli ta difísil pa saka plùs e suministro mester pasa via tera, ta hasi su transportashon pa otro partinan di mundu hopi karu.

“Dubai/Oman” ta krudo ku ta bin for di medio oriente. Ta un meskla di petroli ku ta bin for di Dubai, Oman òf Abu Dhabi, i e ta e punto di referensha pa petroli di Golfo Pérsiko ku ta keda entregá na merkado Asiátiko.

Pues pa resumí, “Brent Crude” ta e punto di referensha pa dos tersera parti di e krudonan ku ta keda komersialisá rònt mundu. WTI ta e punto di referensia dominante pa Merka, i Dubai/Oman tin hopi influensha riba merkado Asiátiko.

Tin desenas mas di punto di referensha, kada un ku ta representá petroli ku ta bin di sierto partinan di mundu, pero mayoria ta vinkulá ku e 3 puntonan di referensha ariba menshoná.

Awó ta ki e pregunta original mes tabata atrobe? Ow ya….dikon Schotte a menasa di feita Asjes su sejasnan pa baha preis di gasolin bèrdat.
Wèl, por si akaso bo no tabata sa, Curoil ta kumpra gasolin for di PDVSA. PDVSA ta di Venezuela, ku ta miembro di OPEC. OPEC ta un organisashon di paisnan ku ta eksportá petroli (Organization òf Petroleum Exporting Countries), manera Saudi Arabia (kual ta esun di mas grandi den OPEC), Iran i Venezuela.

Opec

Na Yüni 2014, preisnan di krudo tabata kore banda di 100 pa 115 dòler pa barí. Pa aworakí krudo Brent ta kore banda di 60 dòler.

Preisnan a subi, debí ku demanda tabata haltu. Paisnan manera China tabata kumpra masha hopi petroli mes. Tambe dor di e konflikto na Libya ku ta pais klave den e mundu di petroli. Produkshon di petroli no tabata por a kumpli ku e demanda. Manera m’a splika den mi “spoedcursus” di ekonomia, si demanda subi, preis ta subi. Awó no ta tur bia ta demanda a subi. Si produkshon ta asina abou, ku e no por kumpli ku tur e demanda, bo ta haña bo ku un situashon kaminda bo demanda ta mas tantu ku bo suministro. Pues……preis ta bai laria.

Pero e preisnan haltu ei tabata duna hopi hende dolo’i tete. Preis di krudo haltu ta pone preis di gasolin subi, kual ta pone preis di transporte, awa, koriente, kuminda i tur kos subi. Te asta prostitutanan ta subi nan preis. No por!

Pues e situashon aki a stimulá paisnan manera Canada i Merka durante 2008 pa 2014 pa kuminsá koba mas en buska di petroli, ku ta difísil pa saka for di teranan di North Dakota, Texas i Alberta. E petroli aki na e momentu ei tabata mas rendabel. Produkshon global di krudo ta 75 mion barí pa dia. Merka so a añadí 4 mion barí mas pa dia, kual ta hopi.

oil barrels

Pero segun tempu ta bai, e subida di produkshon di Merka a pèrdè efekto debí na konfliktonan na Libya i Irak. Despues di tempu atrobe, e konfliktonan a kuminsá fria i na mes momentu, demanda pa petroli for di paisnan den Europa, Asia i Merka a baha debí na un ekonomia suak i ménos konsumo di petroli. Atrobe….demanda baha, preis ta baha.

Segun preisnan tabata baha, mundu tabata en espera di OPEC pa baha produkshon pa asina e preis por subi bèk. Paisnan manera Saudi Arabia, Rusia, Iran ku Venezuela mester di e preis pa keda haltu (riba 80 dòler pa barí) pa asina nan por balansá nan presupuesto. Pero den un reunion grandi ku OPEC tabata tin den Novèmber na Viena, Saudi Arabia a disidí ku nan no ta subi e produkshon, pa nan no pèrdè merkado. (Den pasado na aña 1980 nai Saudi Arabia a baha produkshon, i nan a pèrdè basta merkado, pues nan no ke pa esaki sosodé atrobe.) Rusia (ku no ta miembro di OPEC) tampoko no ta bai baha produkshon. Esaki tin mas di haber ku motibunan tékniko ku nan no por bah’é mesun fásil ku Saudi Arabia, i tambe nan mester di plaka.

Esaki a pone ku preisnan a subi “glijbaan” slep bin abou, kousando un fiesta pa nos. Pero ekonomia di paisnan manera Rusia i Venezuela si ta sufriendo. Pero ya….”de ene z’n brood is de ander z’n dood!”

Preisnan lo subi bèk atrobe?
Historia ta mustra ku preisnan lo subi atrobe, pero ta difísil pa premirá esei. Un guera na Libya òf Irak por kuminsá ki ora ku ta. China por bolbe kue forsa i pone su ekonomia kuminsá krese manera un mònster atrobe. Kos por drecha na Europa tambe, anto finalmente Saudi Arabia tambe por disidí na baha produkshon, kual ta pone preis subi mesora!

Loke nos tin ku hasi ta kuminsá baha nos dependensia na krudo, i kuminsá uza energia alternativo. Pero sin ku gobièrnu ke bin kobra hende zonbelasting ku windbelasting ku zeebelasting, sino ta mes leu nos a keda.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.