Dikon introvèrtnan por ta e mihó empleadonan!

Reading Time: 6 minutes

Manera mi a indiká un bia, mi a deklará mi mes embahador di tur e introvèrtnan. Awor mi ta bai splika dikon ta introvèrtnan mester manda mundu. Bon ya, no presis manda mundu, pero dikon introvèrtnan ta e mihó empleadonan ku bo por tin den bo kompania!

Esaki no ta pa bagatelisá niun èkstrovèrt, pero den un mundu kaminda hopi hende no ta komprondé introvèrtnan mashá, mi tin ku duna e motibunan pa bo por mira kiko t’e benefisionan ku bo tin ku un persona introvèrt den área di trabou.

Introverts1. Nan ta pensa promé ku nan papia
Kontrali na èkstrovèrt ku ta papia, despues analisá ta kiko nan a bisa, introvèrtnan ta hopi kouteloso pa ku lokual nan tin ku bisa. Esaki lo yuda den diferente área di trabou. Por ehèmpel un dòkter ku tin ku bisa famia ku nan ser kerí no a sobrebibí operashon. òf un abogado ku tin ku informá e famianan ku e ser kerí a fayesé lagando bòshi debe atras pa nan.

Èkstrovèrtnan ta papia hopi tambe. Semper nan tin hopi ko’i bisa i hopi bia nan ta interumpí bo pa nan por bisa algu dor ku nan no por warda nan bùrt pa papia. Introvèrt ta skucha bo kompletamente. Segun bo ta papia e ta analisá tur loke bo ta bisa, i por dunabo un kontesta òf opinion ku un pensamentu profundo su tras.

Hasi bon uzo di esei!

2. Introvèrtnan ta malu den ‘small talk’
Sinseramente mi ta preferá bo keda ketu, ku bin papia ‘jibber jabber’ den mi kabes. Pasó ami no sa kiko mi tin ku bisa bo. Puntra algu, i bo ta haña kontesta. Kuent’i “konta ku mama ku papa” , ami ta keda wak bo duru den bo kara!

Na trabou hopi hende ta kansa di sinta tras di nan kòmpiuter òf ke kue airu un ratu. Nan por lanta ba bai baño òf kushina. Èkstrovèrtnan ku si ta HOPI bon den ‘small talk’ por start un kombersashon di 45 minüt largu gewoon papiando yen kos. E 45 minütnan aki ta pagá nan ta. Ke men si bo ke evitá ‘loopuren’ den bo kompania, tuma introvèrtnan den servisio. Menos papiamentu, mas trahamentu!

Hasi bon uzo di nan!

3. No tin kompetensha pa popularidat
Hende hopi bia hende ta drenta kompetensha ku otro pa sobresalí. Hopi bia nan ke ‘shine’, nan ke pa tur hende sa kiko nan a hasi òf logra. Esaki tin bia ta krea frikshon riba trabou, prinsipalmente ora un hende kuminsá hasi di mas.

Ku introvèrtnan bo no tin e problema aki. Nan ta kapas di hasi hinter e trabou p’abo riba nivel i laga otro hende manera un èkstrovèrt bai present’é, pues tremendo trabou den tim. Bo tin ku wak e èkstrovèrt bon si, pasó e ta kapas di bai bisa ku ta e so a traha tur e kos.

Wak e èkstrovèrt na’i bon!

4. Kreatividat ta nan parti fuerte!
No kere ku pasó hendenan introvèrt gusta ta nan so, i no ta masha sosial ta nifiká ku nan lo sinta hinter dia será den nan kantor sin produsí nada. Al kontrario. Nan mente ta konstant kreando i pensando ideanan nobo, improvisá proseduranan, inventá strategianan diferente pa e kompania por funshoná mihó i bai dilanti.

Bo ke bo kompania bai dilanti tòg?

5. Nan por ta bon lider
Un di e motibunan ku introvèrtnan por bira bon lider ta pasó nan ta skucha tur hende bon. Nan lo preferá sinta apart ku bo, skucha kada un palabra ku bo bisa, i tuma akshon bon fundá.

Lidernan èkstrovèrt gusta ta drùk, i ora bo ke papia ku nan, nunka nan no tin tempu pa skucha, pasó ta nan so ke papia.

6. Nan no ta papia, a ménos ku nan tin algu importante di bisa
Den algun kompania ku tin hopi hende èkstrovèrt, lo bo por hañabo ku reunionnan largu ku no ta produktivo ‘at all’. Dor ku tur hende ke ‘shine’, tur hende ke papia, niun no ta skucha otro, i e reunion hopi bia ta kana sin struktura, i na final niun hende no sa kiko ta bai bira nan tarea.

Si bo tin introvèrt aden, e reunion lo ta konsiso i al kaso. Introvèrtnan no ta keda papia gasta energia innesesariamente. Hopi hende tin e persepshon ku nan ta tímido pa bisa lokual nan tin ku bisa, pero introvèrt ta bisa loke nan tin ku bisa, solamente si esaki ta importante pa bisa.

‘Jibber Jabber’ no ta yuda ku un dònder!

introverts37. Opservá, Opservá, Opservá
E introvèrt ta un spesialista den opservashon. Ke men si e bisa algu ku el a ripara ta pasó e tin basta ratu kaba ta opservá i analisá e kos.

No ta hendenan ku ta papia ko’i kèns pa loko.

8. Redu
Awendia den hopi kompania hasiment’i redu ta al órden del dia. Empleadonan ku ke krea kòmbersashon òf konekshonnan superfisial, òf ke sintínan superior dor di papia riba atras di otro hende ta i lo hasi redu hinter dia. Introvèrtnan no tin energia pa hasiment’i redu.

Nan nivel ta muchu mas ayariba pa sinta papia di redu i kosnan ku no ta produktivo ni no ta yuda ku apsolutamente nada.

9. Nan lo apresiá trabounan individual
Èkstrovèrtnan hopi bia no gusta ta, ni traha nan so. Nan lo preferá proyektonan den grupo.

Esaki no tur bia ta malu, pero tin diferente investigashon hasí ku ta mustra ku trabou den grupo hopi bia ta kita hende for di nan meta òf ta influensha personanan mas tantu i mata kreatividat. E ta yuda den ‘brainstorming’, pero na momentu di konkretisá proyektonan den un bon formato, ta rekerí un persona pa pone su atenshon kompletu na e proyekto. Introvèrtnan lo no tin problema pa hasi esaki.

10. No interumpí nan
Introvèrtnan ta hendenan ku ta pensa hopi profundo. Esei ke men ku kualke kos ku interumpí nan ta saka nan for di un pensamentu asina leu ku e ta difísil pa nan por reanudá trabou bèk mesora. Nan lo baha volúmen di telefon, i lo asta laga e telefon rin te dròp, pa evitá ku esaki ta bai stroba nan i pa asina dedika ‘full’ atenshon na e trabou. Èkstrovèrtnan den sekreto gusta pa hende stroba nan, pasó esaki ta saka nan for di un momentu ku nan ta konsiderá laf. Pa èkstrovèrt, kada un hende ku interumpié ta un hende p’e hala un kombersashon kuné, anto asina nan ta keda drumi riba trabou!

Unabes bo komprondé i respetá e manera di ser di introvèrt bo por saka hopi benefisio for di dje. No ta tur introvèrt ta meskos, i no ta tur èkstrovèrt ta meskos tampoko. Ta rekerí pa bo konosé kada persona individual pa bo sa kon e ta kon e lo funshoná mihó riba área di trabou.

Esaki no ta pa krítika ni bagatelisá niun èkstrovèrt. Si e talentonan di introvèrt wòrdu bon uza den kombinashon ku talentonan di èkstrovèrt lo bo por saka hopi mas djus for di bo tim.

Si bo ta un persona introvèrt, bo por print e artíkulo aki si i pone huntu ku bo CV, òf mail e pa bo koleganan si nan tambe ta haña òf pensa ku bo ta straño, asosial òf muchu ketu!

Si bo ta èkstrovèrt i bo ta haña ku mi a generalisa of eksagera……anto kua? Duna introvèrtnan un chèns!

Introverts2

Saká for di: Lifehack
[Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.