Siña lesa promé ku bo haña gan’i bati bo tengla!

Reading Time: 4 minutes

Manera m’a yegi indiká, mi no sa preokupá ku opinion di hende mashá. Pero awe atrobe mi no tin nada di hasi, anto mi tin hopi gana di pulushá poko!

Mi meta ku e ‘blog’ aki ta pa stimulá lesamentu i amplia konosementu via di artíkulonan skibi den un forma distinto. Mi ta bon na altura ku mayoria di “likes” nan ku e página aki tin ta resultado di un kantidat di artikulonan di seksualidat ku ta skibí den un forma honesto, skèrpi i sin birament’i atras. Mi ta konsiente tambe ku e potrètnan ku mi ta pone komo ‘feature image’ ta atreví i ta atraé bo atenshon di forma inmediato i mi sa ku ta esei ta pone speshi di hende lanta i klek “like” sin buska drechi di nada mas.

Pero lamentablemente, mi no ta e hende di mas fásil ku ta eksistí na mundu, pa motibu ku mi tin tiki toleransha pa mediokresía, flohera mental i hende ku ta papia sin pensa i duna komentario sin lesa!

Meskos ku den sierto artíkulonan mi ta serio, den otronan mi por stroi un tiki peper ariba pa hasi e artíkulo mas interesante pa bo lesa. Ta asin’ei mi ke stimulá bo pa bo lesa. Mi por skohe pa hasié n’e sistema tradishonal ku korantnan lokal ta skibi tambe, pero esei no ta mi stail!

Lesando artíkulonan akiriba bo lo por siña hopi, meskos ku ami ta siña kos nobo tur dia. Pero bo tin ku lesa si. Awó si bo no ke lesa, ta bo prerogativa. Ta bo derechi tambe di duna bo opinion, pasó nos ta biba den un estado di derecho ku tin libertat di ekspreshon. Pero pa bo mala suerte, akiriba ami t’e Presidente , e Promé Minister, e Diktador, e Rei, i e Emperador. Mi lo apresiá bo komentario unda ku bo ke pone, pero na momentu ku bo disidí na duna bo opinion riba algu ku mi a skibi, sikiera les’é promé! Anto si tin un tiki peper ariba, sende bo tinu promé ku bo bati bo tengla!

Ayera riba e página di Facebook ‘CuckooPress’, bou di e artíkulo di “Mirador: no malu pero no bon tampoko”, mi a mira e siguiente komentario:

“Dkn karago semper mester ta yu di korsou ku ta rebaha nan mes pa kada kos ku yu korsou mes ta hasi pa nos mes esun ku a skibi e koi kuenti mirador no malu ni bon mester bula foi brug next time traha e tontei bo mes anto mas na drechi boso pa ami bisabu e lolei ta mal traha sea kontentu ku nan a traha un mirador mas nadrechi i safe pa tur hende hacht hombu”

Djis su tras a bin un yùfrou mas ku e briante komentario:

“Pompa berdat hom si no tabata tin tbm tun problema ju kor alfin”

Tremendo uso di ortografia dor di ambos persona por sierto!

Opviamente e personanan aki no a ni habri e ‘link’ te p’e lesa e artíkulo. Ora mi wak profil di e promé persona mi ta mira un yònkuman ku ta reklamá ku e muhénan no ke kontesta ora e manda nan un mensahe. M’a ta klaro ku nan no ta kontesta, pasó probablemente ta disparate so bo ta papia ku nan.

Mi ta hinka hopi tempu skibiendo diferente artíkulo tur dia pa duna bo material pa ora bo manda hende un mensahe bo tin algu na tinu pa papia. Pero, nò, bo no ke lesa. Bo ke bati tengla hunga Einstein si.

Pues shonnan, stòp di sinta den sofá hinter dia, ku bo man den bo karson ta ranka drachi pa kishikí bo orea kuné. Buska un lesamentu i eduká bo mes, ya asina dia bo tin habri bo boka pa bisa algu, sikiera bo tin kos na tinu pa papia, en bes di diskutí ku si bèrdat Dongo su ‘vibe’ ta h*dedo òf laga!

Lo ta negligente di mi parti si mi keda sin menshoná ku aparte di e dos komentarionan ariba tin otro komentario di personanan ku si a lesa e artíkulo kompletu i a komprondé e intenshon su tras. Mi ta apresiá esakinan mashá!

Think before you speak

[Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook

Leave a Reply

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.