Señalnan ku bo no ta kla pa drenta un relashon!

Reading Time: 7 minutes

Relashon a bira mané un kos ku tur hende ke ta den pa un òf otro motibu. Sea pa benefisio òf pa miedu di soledat òf pasó di bèrdat bo a konosé un persona ku bo ke kompartí bida kuné. Pero hopi hende ta drenta relashon sin ta kla pa relashon i despues ora ku e relashon kibra, nan ta yora, k’e mata kurpa, bula fo’i brùg, i hasi hinter un drama novelítiko.

Relationship ready 1Promé ku bo ke drenta relashon, bo mester sa si bo ta kla pa drenta relashon. Señalnan ku ta indiká ku bo no ta kla pa drenta un relashon ta hopi, pero mi ta bai kue esnan ku hopi hende no ta para ketu riba nan:

Desesperashon:
Tur hende na sierto punto di nan bida lo por sinti desesperashon. Ami no ta mira desesperashon komo algu malu. Bon ya, no ta tur bia e ta algu malu anto. Tin ora komo hende bo por bira un poko eksigente di mas, i desesperashon por laga bo baha for di riba e nubia ku bo ta, i buska kosnan mas real. Tin ora desesperashon ta duna bo e kurashi pa hasi kos ku nunka lo bo no a hasi. Ami ta desesperá tur ora. Ora mi tin hamber por ehèmpel, anto no tin kuminda. Si no ta pa desesperashon ku ta pone mi kome pan bieu mes, awe kisas lo mi por ta morto, anto bosnan tur lo ta yorando aworakí, i sintiendo mi falta.

Si bo ta buskando un relashon serio si, kisas bo tin ku pone desesperashon un banda, a ménos ku bo tin 60 aña. Ku 60 aña di edat i soltero, bo mag di ta kuantu desesperá ku bo ke. Pero si bo ta yòn, entre 20 pa 40 aña, bo no tin ku laga desesperashon afektá bo desishon pa skohe un pareha. Pero si bo tin 40 aña of yegando eibanda nan, anto pa kolmo bo ta vírgen tambe, kisas e ora ei si. Mi ke men, ta kiko bo ta warda anto? Yegada di Santa Catalina de Labouré Milagrosa?

Semper bo a skohe hende robes:
Si bo tin un trayektoria di ta skohe parehanan robes, kisas ta bon pa bo tuma un “break” i analisá bo mes pa un ratu. Pasó no ta mala suerte bo tin, kisas ta riba bo frenta bo tin un “P” skibí. Pues bo tin ku wak den spil un ratu, wak ta kiko abo ta hasiendo robes, ku semper bo ta topa ku e personanan robes den bo bida.

Bo ta buskando amor:
Den e tipo di temanan aki mi ta un tiki kouteloso pa mi no kibra “luchtkasteeltjes” den kabes di hende di forma abrupto. Pero tin ora nos ta buska kosnan ku ta asina skars pa haña ku bo ta terminá birando loko, bieu i soltero. Esaki no ta nifiká ku bo mester drenta un relashon kaminda bo no ta sinti nada pa e persona, pero tampoko bo no mester buska kos ku bo mes no sa ta kiko e ta.

Por lo general amor ta loke bo tin pa bo mama, i bo yunan. Bo pareha ta un hende ku lo komplementá bo pa lokual nan ku bo no tin. Ta un persona ku pa di promé, bo ta hañ’é atraktivo físikamente plùs pa karakterístikanan ku e tin ku lo komplementá esun di bo nan. Pues por ehèmpel un hende indesiso, lo kumbinié wak un hende ku ta sigur di su mes den tomo di desishon. Un hende introvèrt, lo por tin sierto benefisionan serka un hende ekstrovèrt. Si bo ta un persona insigur, bo no tin nada di buska den un persona ku tambe ta mesun insigur ku bo.

Despues bo ta wak si e ta un persona ku bo por komuniká kuné i lo ke kompartí momentunan spesial kuné. Tantu e bon komo e malunan. Pues e loke nos ta yama “amigu”. Pa bo konosé e persona aki bo mester sinti bo bon ku bo mes. No hansha, no desesperá, i no eksigente p’e pone renchi riba bo dede den e promé siman ku bo konosé.

Si bo ta buska amor de novela’s, ku korementu den hardin bistí na blanku ku yen mata bèrdè ku flor kòrá ku kachó chikí ta waf waf, lo bo keda buska te dia bo blikia.

Bo a kaba di sali for di un mal relashon:
Usualmente ora bo kaba di sali for di un mal relashon ta konsehabel pa bo tuma un tempu pa bo detoksifika i rekuperá. Kore drenta den otro relashon mesora ta reseta pa desaster, pasó bo lo bai ta un persona hopi vulnerabel, ferfelu, insigur, iritabel, i ku hinter dia ta kansa hende ku yoradera. Basilá bo so un ratu.

relationships 3

Bo no por ta bo so:
Si bo ta sinti ku bo no por ta bo so, ta pasó bo tin partinan di bo personalidat ku bo tin ku traha riba dje. Esaki lo ta bini di kualke inseguridat ku bo tin, ku ta duna bo miedu di ta bo so.

E seguridat ku relashon ta duna bo, ta un kos ku bo por bira adikto na dje, i e por kousa ku bo ta keda sali fo’i un relashon disfunshonal i drenta otro relashon disfunshonal, te dia bo bira loko. Tambe e por kousa ku bo ta dal pega riba hende, i ku bo inseguridat bo ta sofoká nan asina tantu ku nan ta sali kore pió ku Speedy Gonzalez bai fo’i bo, i abo ta keda atras ta yora, ta zeur ku niun hende no stima bo, i despues bo ke bula fo’i brug, bo ke mata kurpa i yen kos mas simplemente pa bo haña atenshon.

Tin hende tin abilidat pa traha riba nan parti debil nan so, otro hende mester di yudansa. Akinan un sikólogo lo por yuda. No tin nodi tene bèrgwensa. Pero bo mester habri bo mes pa risibi yudansa. Si bo bai serka un sikólogo i bo sinti ku ta koba e ke koba den bo bida, ta pasó bo no ta (kompletamente) habrí pa yudansa. E proseso pa liberá bo mes di dependensha di hende por ta largu, pues buska un sikólogo ku bo ta sinti bo konfortabel kuné, i tene na kuenta ku e ta un proseso ku por dura lunanan largu i tin bia asta añanan largu.

Awor, mi por komprondé si ku tempu a bira malu, i ku pa un hende muhé biba su so por ehèmpel, e ta poko difísil. Buska un spantapara pone dilanti bo porta di kas, i kumpra 2 pitbul bo pone den kura. Si bo no gusta drumi bo so, kumpra un “opblaspop” pone riba bo kama i bo drumi brasá kuné.

Mihó bo drumi bo so, ku drumi banda di hende ku despues por bira bo pió enemigu!

Pasó bo ke kasa:
Si ke drenta un relashon, djis pasó bo ke un hende pa bo kasa kuné, bo ta hasiendo kos robes riba kos robes. Mayoria hende aktualmente tin un bida miserabel pasó nan ta hasi kos robes riba kos robes ku despues ta resultá den un bida manera un tutu di bonchi pretu bruá ku layena mal garná.

Awendia kasi mitar di matrimonionan ta resultá den divorsio. Anto mei mei di esei tin diskushon i te asta violensha doméstiko ta sosode. Nan ta bisa ku e proseso di divorsio ta kousa mesun tantu strès ku pasa den aksidente di outo tur dia durante seis luna largu. Promé bo skohe pa pasa den e labatiba ei, lo ta bon pa bo pensa riba e idea ei un tiki mas mihó!

Lesa e artíkulo di motibunan robes pa drenta matrimonio i disidí pa bo mes si bo ke kasa pa e motibunan korekto òf e motibunan robes!

Mi ta bolbe ripití: mihó bo so, ku banda di un persona ku lo por bira bo pió enemigu!

Domestic abuse, family and social issue[Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook

Leave a Reply

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.