Arogansia, di unda e aktitud aki ta bini?

Reading Time: 5 minutes

Dikon un hende mester ta arogante?
Kiko ta kousa arogansia?
Kiko ta e diferensha den arogansia i konfiansa den bo mes?
Kon ta atendé ku un persona arogante?

Nos tur lo mester a yega di topa un persona ku tin un aktitut arogante. Un persona ku kier sa ku semper e tin rason, e kier sa ku semper e sa tur kos òf e ta kere ku e por hasi tur kos mihó ku tur otro hende. Esaki ta karakterístikanan di un persona arogante. Hopi chèns ku e persona aki ta kere ku e no ta arogante, sino mas bien e tin konfiansa den su mes. Sinembargo tin un diferensha grandi den e 2 aktitutnan aki.

Ki ora un hende ta haña konfiansa den su mes?
E ta masha fásil. Laga nos kue por ehèmpel bulamentu di kabuya. Si mi pidi bo aworakí pa bula kabuya 1000 bia pa mi, lo bo ta duda den bo mes. Kisas bo por, kisas bo no por, paso nunka bo no a yega di hasié. Na momentu ku bo a bai purba, bo a yega 25 so, i ya kaba bo ta lenga afó.

Mi ta puntra un otro persona pa hasié, pero e persona aki tin kustumber di bula kabuya 2000 bia pa dia. Pues 1000 bia ta “koekje” p’e. E ta yega kue e kabuya ei, kuminsá bula, te bisa un “versje” tambe miéntras e ta bulando.

Kiko esei kier men? Ku mas tantu bia bo hasi algu, mas konfiansa bo ta haña den bo mes, ku bo por hasié, i ku bo por hasié bon, paso bo tin kustumber di hasié. E ta bira algu normal pa bo.

Awor kiko ta pasa na momentu ku ta abo so por bula kabuya 1000 bia. Tur sobra hende ku a bai purba bula kabuya nan tur ta kansa te dal abou promé ku nan yega 100. Esei ta duna bo un sintimentu di superioridat.

Esei ta pasa meskos den un persona ku por hasi negoshi. E ta lanta un kompania i hasié un éksito kaminda ku mayoria otro persona ta faya i frakasá. E persona ei ku si a logra ta haña un sintimentu di superioridat. E persona aki ta bira arogante na momentu ku e ta pensa ku e ta invensibel òf  no vulnerabel. Den sierto situashonnan nan por pensa ku nan ta iremplasabel, paso e loke nan ta hasi ei, ta nan so por hasié.

Unda e diferensha ta sinta?
Un persona ku tin konfiansa den su mes lo no tin problema pa mustra otro persona kon el a logra òf yuda otro persona pa nan tambe por logra. Esaki ta debí ku e no tin e nesesidat pa keda e úniko persona ku por. Sinembargo e persona arogante si. Dikon? Na momentu ku e persona aki a logra algu ku poko persona a logra, e ta kuminsá uza esaki pa tapa su debilidatnan. Tur hende tin debilidat, solamente tin hende ta skonde nan pa motibu ku nan ta sinti nan mes vulnerabel si otro hende haña sa kiko nan debilidat ta. Pues e persona arogante aki básikamente tin un sintimentu di inferioridat i e ta uza e arogansia pa tapa su debilidatnan.

Ta mas ku klaro e ora ei ku e persona aki lo no ke yuda niun hende pa logra meskos ku el a logra, paso esei lo kita e bentaha ku e tin riba hende. Den sierto situashonnan tambe e persona arogante aki  por bira masha insigur i defensivo na momentu ku e ripara ku tin un òf mas persona ku por hasi mes bon òf mas mihó e loke e ta kere ku ta nan so por hasi.

 

arogansia

Religion i arogansia.
Un di e kosnan ku mas ta mustra arogansia ta religion. Mayoria religion ta kere ku nan ta superior na e otro. Esaki ta básikamente un malesa religioso i ta bai totalmente kontra di loke Dios realmente ta para pe. Paso si enbèrdat bo ta kere i ta práktika palabra di Dios, lo bo no ta sintibo superior na niun hende di ningun forma.

Kon pa atendé ku un persona arogante?
Si bo sa dikon e persona aki ta arogante, ta bira mas fásil pa bo atendé kuné. Un persona arogante ke pa bo trat’é komo un persona importante debí ku e ta kere ku ta e so por hasi sierto kos òf tur kos. Pues si bo ke krea un relashon di pas ku un persona asina, bo tin ku mustr’é ku e ta importante, i e lo respetá bo. Si bo ke pone un persona arogante su kabes saka huma, bo tin ku ignor’é i mustr’é ku pa bo e ta un persona meskos ku kualke otro persona.

Bo mes por komprondé ku e aktitut di un persona arogante ta pone ku hopi hende no ta gust’é. Niun hende no gusta un persona ku kier sa e ta superior na otro. Pues na momentu ku bo ta mustra e persona arogante ku e ta importante, tin chèns ku sobra personanan lo no gusta bo tampoko. Pues ta bon pa bo splika nan dikon bo tin tal aktitut ku e persona en kuestion. Na momentu ku bo tin un bon relashon ku e persona arogante, ta mas fásil tambe pa bo deskubrí su debilidat(nan), i asina bo por yud’é tambe dor di mustr’é ku tur hende tin nan debilidat pues no ta nesesario skonde di bo i ménos tap’é ku arogansia.

Kon bo ta kontrolá bo punto fuerte sin ku e mester bira arogansia?
E ta simpel. Manera e dicho mes ta bisa “Suku no sa gaba su mes”. Si bo ta bon den algu, bo no mester mustra hende ku bo ta bon. Hende mes lo mira ku bo ta bon.

Si bo tin un outo nechi ta kore por ehèmpel, bo no mester kana papia tur kaminda kon nechi i luhoso bo outo ta. Hende mes lo bin ripara ku bo tin un bunita outo, i lag’é keda na nan pa dunabo un kòmplimènt si bèrdat nan ta hañ’é bunita. Si bo keda simpel i humilde, hende lo tratabo tambe komo persona simpel i humilde.

 -LS-

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.