Hende muhé mester kana ku nan kondon?

Reading Time: 13 minutes

Na aña 1993 kondon femenino (polyurethane condom) a keda introdusí na Merka. Ekspertonan di salú a elogiá e produkto i a yam’é un “game-changer”, pasó e muhé awor ta haña kòntròl total riba su salú, sin ku e mester dependé pa e hòmber uza protekshon. Si e kondon femenino keda usá korektamente, e lo por prevení tantu embaraso komo malesanan seksualmente transmití. Su efektividat ta entre 94 pa 97%.

Pero dos dékada despues ainda e kondon femenino no a pega manera a spera. Prensa ta hasi chèrchi di dje, dòkternan ta ignor’é, anto hende muhénan ta evit’é. Awendia di tur e kondonnan ku ta keda mundialmente distribuí, solamente 1.6% ta kondonnan femenino.

female condom 4 

female condom 1E kondon femenino aktual ta relativamente mas grandi ku esun maskulino. E ta manera un saku pa hende bai supermarket kuné. Grandi i fastioso. Ora bo wak’é, bo ta puntra bo mes ta kon hundu e muhé su vagina ta anto? Banda di su aparensha spantoso, e produkto ta hopi mas karu ku e kondon maskulino. Na su entrada na 1993, e tabata kosta 5 dòler pa unu, anto segun estudionan, hende muhé ta hañ’é hopi difísil pa uza. Pa un muhé ku ta sèks 3 bia pa siman, e ta ferfelu. Un prostituta lo bati bankrut si e uza e produkto.

Sientífikonan tur e tempu a keda studia e produkto i purba na hasié mas fásil pa uza. E produkto nobo ta drentando merkado. E produkto inisial, kual nan ta yama FC1, a wòrdu mihó aseptá na Afrika. Pa subi e aseptashon mundialmente, sientífikonan a kambia pa un otro material (nitrile, kual te material ku ta keda uzá den hanskunnan médiko), kual awor nan ta yama FC2. Esaki ta baha e preis di e produkto i awor kantidat di kondonnan femenino distribuí rònt mundu a subi di 25 mion te na 50 mion.

female condom 5Biniendo bèk riba e meta di e kondon, e intenshon original tabata pa duna muhé mas kòntròl riba nan propio salú. Sinembargo, den kabes di hende muhé tin yen otro kos.

Por ehèmpel, na paisnan afó, bo ta haña hende muhé ta kana ku kondon den nan tas. Esaki ta sumamente normal. Na paisnan un poko mas atrasá (despensa p’e insulto) nan tin otro kerensha. Por ehèmpel, nan ta pensa ku si bo mira un muhé ku kondon den tas, ta pasó e ta sèks parotin. Asin’ei tin yen otro kerensha mas ku ta duna e muhé bèrgwensa pa e no kana ku un kondon den su tas. E muhénan tin un tendensha di ke pretendé di ta sur, i no kana ku kondon, pasó supuestamente nan no ta hende ku ta sèks parotin, òf ta kana ku idea pa sèks ku ken ku nan topa.

Pero manera nan ta bisa “anochi tur pushi ta pretu” anto miéntras ku hende muhé tin e “bèrgwensa” ei, kantidat di kasonan di HIV ta subiendo drástikamente, i na Kòrsou tin mas hende muhé ku HIV ku tin hende hòmber infektá ku e vírus. Esei ta e realidat di Kòrsou, i te ku Desèmber 2014 tabata tin alrededor di 1700 persona ku HIV na Kòrsou.

Ku kiko e bèrgwensa òf e orguyo ei ta yuda protehá bo salú kontra malesanan seksualmente transmití?

Enkuesta
Manera semper, kuriosidat ta dal mi, i mi a bai hasi algun persona un par di pregunta tokante kondon.

Mi a manda un formulario ku algun pregunta pa un total di 23 hende muhé, di kual 12 a reakshoná i un total di 7 hende hòmber a risibi e formulario di kual 5 a reakshoná.

(Mi mester di mas hende hòmber, pero por Dios, mi no sa unda e hende hòmbernan ta. Mi no sa si ta den pal’i watapana den mondi na Afrika nan a keda pegá òf ta miedu nan tin. Mi mester di mas hende muhé ku ta reakshoná tambe. No muhé ku ta duna mi nan e-mail adrès, pero nunka nan no ta wak e-mail.)

Di e 12 hende muhénan ei, 3 (25%) ta bou di 30 aña di edat, i 9 (75%) entre 30 pa 50 aña. Esaki ta djis pa bo sa ku no ta mucha chikí tin den mi investigashon.

Di e 5 hende hòmbernan, tur 5 ta bou di 30 aña di edat. (Bon, esei no ta nifiká ku nan ta mucha chikí.)

woman with condomBo sa kana ku kondon?
Mi kier a sa kuantu di nan sa kana ku kondon huntu ku nan. Di e 12 hende muhénan, 5 (42%) ta kana ku kondon i 7 (58%) no ta kana ku kondon.

Den esnan ku ta kana ku kondon, nan a splika ku nan ta kana ku kondon pasó un ganga por kai, anto ora e ganga kai bo mester ta prepará. Mi ta sita algun kontesta. (Mi a drecha e frasenan djis pa nan ta den bon papiamentu. Mi ta spera e hendenan no rabia ku mi):

1. “Si mi ta den un situashon ku a sali ‘un ganga’ i no tin chèns pa kore kumpra, i si e hòmber bin bisa “oops mi no tin”, e ora ei ami si tin.”

2. “ ‘It takes 2 to tango’. Plùs mi no ke ‘mis un kans’ pasó mi no tabata prepará. Pasó sin kondon no tin penetrashon.”

3. “Mi ta kana ku kondon pasó mi ta soltero i por sosodé ku mi ta haña gana di tene un ‘one night stand’. Pues dor ku mi no tin un ‘vaste partner’ mi tin semper un kondon huntu ku mi ‘just in case’. Si mi lo tabatin un ‘vaste partner’ lo mi no kana ku kondon.”

(Tin ora mi ta lamentá ku mi no sa ta ken e hendenan aki ta, pasó esun último ei, lo m’a dun’é mi number mesora.)

En todo kaso, den e hende muhénan ku a bisa ku nan NO ta kana ku kondon, nan a indiká ku nan no ta sèks ku e promé idiot ku presentá nan dilanti. (Nan no a bis’é asina, ta ami ke dramatisá e kos.) Mayoria ta tene kondon na kas si, “por si las moscas”.

Un di nan a indiká ku e no ta kana ku kondon, pero sèn si, pa evitá ku kondon ta bira bieu den tas i krea buraku. (E dama aki ta hopi sabi, pasó kondon ku buraku ta problema.)

Dos di e respondentenan a indiká ku nan ta den relashon serio pa largu tempu kaba i nan no ta usa kondon.

E hòmbernan:
Di e hòmbernan 4 a bisa ku nan ta kana ku kondon, i 1 a bisa ku e no ta kana ku kondon. Di esnan ku a bisa ku nan ta kana ku kondon nan a indiká ku ta pa práktika “Safe sex”

Mi ta sita un kontesta:

“Na edat yòn masha fásil bo ta haña ganga pa sèks ku un muhé, pues mester ta prepará, pasó ke muhénan di awendia bo n’ por tribi bai sin kondon.”

(Ta kiko a pasa e muhénan di awendia? Dje brabu ei na ta?)

E kabayero ku NO ta kana ku kondon a indiká ku e no ta sèks pa loko. (Anto e muhénan di ku no tin bon hòmber na Kòrsou?)

Bo tin bèrgwensa pa kumpra kondon?
Semper mi tabata tin e sospecho ku hende muhé no sa kana ku kondon, pasó nan tin bèrgwensa pa kumpra kondon. Pues mi a puntra e damanan si nan a yega di drenta un tienda/toko/botika òf supermarket pa kumpra un kondon. Di e 12 respondentenan, 8 (67%) a yega di kumpra kondon i 4 (33%) nunka a yeg’i kumpra kondon. Riba e pregunta ku si nan tin bèrgwensa pa kumpra kondon, 5 (42%) a indiká ku nan tin bèrgwensa i 7(58%) no tin bèrgwensa.

Di e respondentenan maskulinonan, 4 a indiká ku nan no tin bèrgwensa, i 1 a indiká ku e tin bèrgwensa.

Marka di kondon ta importante?
Mi a puntra ku si marka di kondon ta importante òf kualke kondon trahá ku plèstik òf bals mes ta bon.

Solamente un di e respondentenan femenino a indiká ku nan no ta preokupá mashá ku kalidat di e kondon. E sobránan si ta haña kalidat masha importante. Nan ta preferá di uza durex, i si e hòmber no por kumpra e kondon, nan lo no tin problema pa kontribuí.

Tin dos kontesta ku mi tin ku sita pa bo. (E muhénan aki ta loko):

1. “P’esei mes mi mes ta kumpr’é i kana rònt kuné. Mi no ke marka barata ku ta duna mi “grawatashi” despues òf ta kibra hinka mi den baina. Mi ta alèrgiko tambe pa diferente produkto pues mi ta preferá di tin mi mes kos ‘op zak’. Dor ku mi no tin bèrgwensa pa kumpra kondon mi ta tuma mi tempu ora ku mi ta bai kumpra tambe. Banda di kalidat mi ta kumpra nan ku algu èkstra tambe (pues di diferente koló/holó i modèl).

(Esaki ta loke mi ta yama un bon “Condom Shopper”)

2. Bon mi no ta uza kondon ku mi partner na kas !!! Mi ta uza kondon ku esun di afo…hhihihihihihi…(bo a bisa ser honesto) !!! Kontestando bo pregunta: P’esei mi ta kumpra durex pasó mi sa ku e ta bon kalidat i ademas tin un ku ta paki koló shinishi ku ta sensitivo, esei ta pa e hòmbernan ku no sa uza kondon pa nan no flèt ora di bistié !!! Pasó e ora ei si mes un leu nos a keda !!!”

durexE hòmbernan:
Mi a puntra e respondente maskulinonan kiko nan ta pensa rondó di e preisnan di kondon. Un kos mi por bisa. Ora gana di sèks dal un hòmber, nan lo kumpra kondon marka Louis Vuitton di 1000 dòler mes.

Mi ta sita algun kontesta:

1. “E preisnan ta bon bon”.

2. “Nan ta bon, djis ora mi pensa e dushi ku mi tei pasa mi n’ ta wòri ke preis mes.

3. “Mi ta haña ku e ta bon pasó e ta mas barata ku un kaha di pampers”

(Esun último ei lo mester ta un ekonomista.)

Mi a puntra e hòmbernan tambe si nan a yeg’i hañanan den un situashon kayente di sèks, i nan no tabata tin kondon, i nan pareha femenino tampoko. Tur a kontesta ku nò ku eksepshon di unu. Esei a kontesta lo siguiente:

“Si, den mi kaso tabata un amiga di kas, mi n’ wòri , m’a bai guera gewoon.”

Tambe mi a puntra nan e mesun situashon, pero ku e dama a “save the day” i a saka un kondon. Aparentemente niun no a pasa den esei.

(Si boso pèrmití mi duna mi kontribushon, ami si a yeg’i pasa den tur e situashonnan aki. Mi no tabata tin kondon, kondon a kaba, kondon a kibra, plùs muhénan a saka paki di kondon riba mi. E dia ei mi a kai stimá mesora tambe.)

Lo bo sèks sin kondon?
Tin bia bo por haña bo den un situashon kayente di sèks ku ni abo ni bo pareha no tin kondon. Mi a puntra e damanan si nan lo sèks tòg, maske nan no tin kondon.

Dos di e respondentenan a bisa ku nan ta bai e gewoon, i un di nan a indiká ku e hòmber lo tin ku basha su spèrma afó si. Un otro dama a bisa “Tin biaha”. (Mi tin gana di sa kua biaha si, kua biaha nò.)E sobránan a bisa ku nan no ta hasié, a ménos ku ta nan pareha figo.

Lo bo drenta un areglo ku bo pareha ku un bia e ta kumpra kondon i otro bia abo?
Riba e pregunta aki mayoria a indiká ku esaki lo no ta un problema. Un di nan a bisa lo siguiente:

“Basta e kumpra kondon di e kalidat ku mi ta uza i tin un tiki fantasia i no kumpra esunnan laf laf.”

(Kiko ta kondon laf laf? Ta kondon ku ta trel e ke?)

E hòmbernan:
Di e hòmbernan 3 di nan a indiká ku nan lo hasié si e dama pèrmití, e otro dos nan a bisa ku nan lo no hasié.

Mi a puntra e hòmbernan tambe ku si nan pareha sera akuerdo ku un bia e dama lo sòru pa kondon e otro bia e kabayero mester sòru pa kondon, ku si nan lo bai diakuerdo ku esaki? Tur a kontesta ku e ta tremendo idea.

female condom 2Si kondon femenino bira mas popular i barata, lo bo kumpra òf uza esaki na lugá di kondon maskulino?
Riba e pregunta aki, 3 di e respondentenan femenino a indiká ku nan lo uz’é, aunke e ta deskonosí pa nan. Pues ta dependé si e ta konfortabel. E otronan a indiká ku e no ta mustra konfortabel, I e ta mustra hopi mas kompliká ku esun maskulino. Manera semper tin kontesta ku mi tin ku simplemente sita:

1.No, ami no ke sinti nada otro ku no ta su parti íntimo den mi pia.”

2. “Ami lo no uz’é pa miedu p’e n’ keda pegá paden.”

3. “No mi no ta kere. Mi a yega di wak e i asta ful’é i ègt mi no ta komprondé ni sikiera kon pa bistié te pa mi uz’é. E ta mustra mi kompliká anto te ora bo ke bai bistié mi kier sa bo a desha kaba.”

4. “Nunka ma uza kondon femenino. Pero e no ta bai pa mas barata, e ta bai ku e ta eksigí un “vaardigheid” pa but’é. Ora bo ta kayente (ami anto) mi no ta dje “vaardig” ei….anto e or’ei un kondon di hende hòmber ta mas fásil.”

(Awèl si…..keintura di sèks ta pone hende pèrdè “vaardigheid” tambe.)

female condom 6Di e kabayeronan 2 di nan a indiká ku nan no por duna opinion rondó di kondon femenino, pasó nan no konosé, i 2 a bisa ku nan lo no tin problema si e muhé uz’é, i un a indiká ku e no gusta e kondon ei, pasó e ta sinti straño. (Mi por imaginá mi.)

Por último….tin muhé ta haña ku e hòmbernan ta floho i ku a ni un kondon nan no ke bisti. Komo hende hòmber, kisas nan lo ta haña ta great pa e muhé bistínan e kondon. Pues mi a puntra e hòmbernan si nan lo ke pa nan pareha bistínan e kondon. Mayoria a indiká ku no ta importá, basta nan tin e “pèchi” bistí.

Di e damanan unu so a indiká ku e no tin pasenshi pa hasi e kos ei. Mayoria di e respondentenan a indiká ku nan lo no tin problema pa bistié, aunke un di nan a bisa ku si ta kada bes e tin ku hasié, e kos lo pon’é fada, pasó ta e hòmber su pénis, pues t’e mes mester bisti su kos. Atrobe, tin kontesta ku mi mester sita:

1. Mi ta bistié, ta parti dje wega. E “feeling” di tene su pénis duru i bistié e kondon ta hasi mi mas kayente.

(Waw….)

2. “Ami semper a bisti mi pareha e kondon. Ora mi tabata riba antibiótika mi ta bistié ku mi boka, pero sin usa mi djente.”

(Hopi kreativo…)

3. “Kompolaga mi ta bistié !!! Kòrda si bo ke ‘keep your man @ home, you need to be a lady but a biatch in bed !!!’”

Mi ta totalmente diakuerdo ku e último ei.

Finalmente mi ta konsehá tur hende, tantu hòmber komo muhé pa kana ku kondon. No ta importá si bo ta seksualmente aktivo si òf no. E asuntu di bèrgwensa ei no ta yuda bo ku nada. Mihó kondon ku malesa. Dado kaso e kondon bira bieu, kue bo supl’é, kolog’é den kas, of yen’é ku awa, duna e muchanan pa nan kore hunga kuné, i kumpra otro pone stand-by!

women with condomE artíkulo aki tabata bastante largu, pero mi ta spera bosnan a siña algu di dje. Por fabor, sigui “share” i esnan ku no a “like” e “page” ainda, kòrda “like”. Ta eseinan ta mi úniko motivashon pa mi sigui skibi mas kos pa bosnan haña ko’i lesa durante reunionnan òf oranan laf di skol òf  trabou.

Si tin (mas) hende interesá pa partisipá den mi kuriosidatnan, manda un e-mail na info@cuckoopress.com, i indiká bo sekso. Nada mas mi no mester. Bo mester ta hende honesto ku kurashi i ku ta wak bo mailnan si. (Junk mail tambe!)

[Danki pa “like i “share”. Mi ta apresiá mashá. Kualke dia ku nos topa, kòrdá mi pa mi regalábo un lòlipòp komo muestra di apresio! Sinti bo liber pa laga bo komentario atras tambe.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.