Ayera nochi, bo sa kiko mi a bebe? Djus! Ora mi ta den un evento sosial (si mi bai), bo sa kiko mi ta bebe? Djus tambe. Karnaval, Pasku, aña nobo, i tur sobra momento, mi sa keda bebe djus. Pero awe mi ta bai hasi un eksepshon. Awe mi ke lubida doló i tristesa, pesei awe sí—aparte di hopi awa— lo mi bai bebe djus tambe. Mi no tin bergwensa di bisa ku mi no sa bebe alkohòl—nunka. Pero mi sa mi ta diferente na hopi otro hende, ku pa deseo di pertenesé na e grupo mas grandi, ku orguyo lo bisa ku nan si ta bebe—bebe te bira fuma!
Djaluna anochi tabata basta drùk den kaya, i den riffort mi a mira un grupo di hóben ku tabata konsisti di tres dama i dos kabayero. E damanan tabata tin kada un 2 bòter di serbes den nan man, i nan tabata mustra fuma. E kabayeronan tabata hasi loke nan ke ku nan. Mi no sa kiko nan ta di otro, ni mi no sa si e damanan tabata ke pa e gainan mishi ku nan. Tur loke mi sa, ta ku e promé slòk di alkohòl, e damanan a hasié konsientemente.
Alkohòl un simpel molekül, pero ku efektonan kompleho riba nos seleber i kurpa. Pa kuminsá, alkohòl ta un droga, ku na momentu ku e drenta bo kurpa, e ta puru venenu. Nos kurpa por prosesá solamente un kantidat limitá (20 mililiter) di alkohòl pa ora. Tur loke bo bebe riba esaki, lo bai dirèkt den bo sanger i kuminsá hasi daño na bo kurpa.
Den bo seleber alkohòl tin efektonan kompleho, kual den kuminsamentu ta pone bo sinti bon, redusí strès. Den un ambiente festivo, e ta stimulá euforia. Mas bo bebe, mas bo ta mira ku bo kurpa i mente no por prosesá esaki. Na momentu ku bo ta bou di efekto di alkohòl (‘tipsy’ òf fuma), bo kurpa ta intoksiká!
Ta keda un misterio pa mi si, kon bin nos ta papia di ‘bebement’i alkohòl’ manera ta algu sumamente positivo, heroiko i fasinante e ta. Ta manera kos ku ta un orguyo hende ta sinti pa por bisa, “Ombu, ayera mi a bebe fuma fuma.” Si, mi sa ku e ta algu legal, i sosialmente aseptá. Pió ku sosialmente aseptá, el a bira un ingrediente pa krea ambiente den nos bida sosial. Si bo ta den un grupo di hende ku ta bebe, lo bo no keda aseptá pa e grupo, si abo keda sin bebe. Pues hopi bes hende ta kuminsá bebe—intoksiká nan kurpa—pa komplasé otro hende. Pues pa hende aseptá mi den nan sirkulo, mi mester hode mi kurpa meskos ku nan ta hode di nan. Ta e kaso ku pa hopi hende, alkohòl bira nan remedi diario pa temporalmente silensiá nan mente un ratu i pa asina nan por sinti bon ku nan mes pa un ratu.
Mi sa tende hende bisa, ku nan gusta e echo ku alkohòl ta pone nan lòs, pa asina nan por hinka nan mes mas den un ambiente. Pero mi ke bo pensa un tiki kiko esaki ta nifiká. Kiko esei ta bisa bo? Ami lo puntra bo mas bien ta ki miedu bo tin ku bo no por ta bo mes, manera bo ke, den ambiente di hende, sin yudansa di un droga? Pasó alkohòl ta un droga ku ta lansa GABA, Glutamate, i Opiods den bo seleber, kual ta un tim di neurokímiko ku segun tempu lo krea un mònster den bo kurpa ku aweró lo bo no sa kon pa libra di dje. Si, mi sa—‘Hoy se bebe!’ Pero defakto, no ta nada ‘great’, nada saludabel, i nada ehemplar den e kos ei!
Den mi bukinan ‘Kibra Hacha‘ i ‘Niun Pátaka‘ mi a papia mas di e efektonan di alkohòl i tokante e manera kon nos ta uza e supstansianan aki pa dil ku nos emoshonnan i dikon nos tin miedu di enfrentánan na un manera sobrio!
